Týrızm jáne sport mınıstri Erbol Myrzabosynov bıyl Japonııanyń Nagoıa qalasynda (19 qyrkúıek – 4 qazan) uıymdastyrylatyn XX jazǵy Azııa oıyndaryna ulttyq quramany sapaly daıyndaýǵa arnalǵan jumys keńesin ótkizdi, dep habarlaıdy Egemen.kz.
Jıynda ulttyq komandanyń quramyn qalyptastyrý, sportshylardyń básekege qabilettiligin arttyrý jáne basym sport túrlerindegi daıyndyqty tıimdi uıymdastyrý máseleleri talqylandy.
Bıylǵy Azııa oıyndary baǵdarlamasyna 43 sport túri engen. Sportshylar 438 medal jıyntyǵy sarapqa salady. Aldyn ala boljam boıynsha, Qazaqstan quramasynan Azıadaǵa 30-dan astam sport túrinen 500-ge jýyq sportshy qatysady.
Mınıstrlik ulttyq sport federasııalarymen birlese otyryp daıyndyq josparyn jasady. Onda oqý-jattyǵý jıyndaryn ótkizý, halyqaralyq jarystarǵa qatysý, sondaı-aq sportshylarǵa medısınalyq, ǵylymı jáne ádistemelik qoldaý kórsetý qarastyrylǵan.
Daıyndyq barysynda arnaıy shtab qurylyp, eń kóp medal alý múmkindigi bar basym sport túrleri anyqtaldy.
Ulttyq quramany jasaqtaýda sportshylardy ashyq jáne ádil irikteýge basa nazar aýdaryldy. Irikteý halyqaralyq jarystardaǵy, sonyń ishinde álemdik jáne Azııa chempıonattaryndaǵy, sondaı-aq irikteý týrnırlerindegi nátıjelerge negizdeledi.