Qazaqstanda tuńǵysh ret álemdik deńgeıdegi «Oceanman Almaty-Kapchagay – 2021» sporttyq sharasy ótedi.
Jarystyń uıymdastyrylǵanyna kóp ýaqyt óte qoımasa da, jyl ótken saıyn qatysýshylardyń sany da, qyzyqty ári tartysty dodany óz elderinde ótkizgisi keletinderiń qatary artyp keledi. Mine, osyndaı baıraqty básekeni kelesi jyly ótkizý baqyty Qazaqstanǵa da buıyrdy.
2015 jyly negizi qalanǵan Oceanman jarysy búginge deıin Italııa, Malaızııa, Meksıka, Túrkııa, Reseı, Grekııa, Fransııa, Ýkraına, Shveısarııa, Taıland, Kıpr jáne Kolýmbııanyń eń ádemi sý aıdyndarynda uıymdastyryldy. Kelesi jyly bul elderdiń qataryna Qazaqstan da qosylady.
Elimizde alǵash ret ótkizilgeli otyrǵan básekege qatysýshylar 4 qashyqtyq boıynsha baq synaıdy. 31 tamyzda balalarǵa arnalǵan 800 metr júzý jáne 1,5 shaqyrym sprınt jarysy josparlansa, 1 qyrkúıekte eresekter 5 shaqyrym (Half Oceanman) jáne 10 shaqyrym (Oceanman) qashyqtyqta saıysady.
Mega-ıventti ishki jáne sheteldik aýdıtorııaǵa tanytý maqsatynda Oceanman Qazaqstan uıymdastyrýshylary Kazakh Tourism ulttyq kompanııasymen kelisimge qol qoıdy.
«Mundaı is-shara tek sporttyq turǵydan ǵana emes, sonymen qatar týrısterdiń nazaryn aýdaratyn shara retinde de tartymdy. Jeke nemese kórermen retinde qatysý múmkindiginen basqa, týrıster búkil Almaty oblysynyń týrıstik nysandarynda kóre alady», dedi Kazakh Tourism Basqarýshy dırektory T. Amanbaev.
«2019 jyly alǵash ret Ispanııadaǵy Oceanman-ǵa qatysyp, 10 shaqyrymdyq jarys meni shabyttandyrǵany sonshalyq – mundaı shara bizdiń elde de ótýi tıis dep oıladym», dedi Oceanman Kazakhstan franshızasynyń ıesi Eraly Ýralov. «Qapshaǵaı sýy – júzý úshin óte yńǵaıly (eýropalyq starttarmen salystyrǵanda, eshqandaı janýarlar kedergi etpeıdi) jáne bul jerde Qazaqstannyń basqa óńirlerine qaraǵanda aýa raıy da qolaıly. Qapshaǵaı mańynda logıstıka óte yńǵaıly. Eń mańyzdysy – Almaty halyqaralyq áýejaıy jaqyn ornalasqan, sebebi júzýge qazaqstandyqtar ǵana emes, sonymen qatar Máskeý, Bangkok, Delı, Beıjiń, Shanhaı qalalarynan keletin qatysýshylar bar», dedi Eraly Ýralov.
Oceanman – bul jyl saıyn chempıonatqa biriktirilgen álemniń ártúrli núktelerindegi birneshe jarys. Qatysýshy bir nemese birneshe júzýdi tańdaı alady. Ár maýsymnyń sońynda chempıonattyń fınaly ótedi. Biliktilik júıesine sáıkes árbir OCEANMAN jáne HALF OCEANMAN-nan alǵashqy 10 áıel men 10 er adam avtomatty túrde Oceanman Worldwide Championship fınalyna ótedi.