Túrkistan oblysynyń taýly aýdandarynda sary kúzdiń salqyny aıqyn seziledi. Aýyl turǵyndary taý basyna eki ret qar jaýǵanyn, úshinshisinde etegindegi eldi mekenderge jetetinin aıtýda. Al óńirdiń ózge aýdandarynda qystyń yzǵary sezile qoıǵan joq, kún jyly. Degenmen qysqa daıyndyq qyzý. Jalpy, oblys boıynsha 2 623 bıýdjettik mekeme jylý maýsymyna tolyq daıyndalyp, qajetti 167,4 myń tonna kómir jáne 5 420,6 myń lıtr suıyq otynmen qamtylǵan.
Al ortalyqtandyrylǵan jylýmen qamtamasyz etetin mekemelerde jalpy 38 qazandyq bolsa, búginde onyń 32-si qysqy maýsymǵa tolyq daıyn. Al qalǵan 6 qazandyqtyń kúrdeli jóndeý jumystary 15 qazanda aıaqtalady. Oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Ábilhan Ábdiqadyrovtyń aıtýynsha, óńirdegi 1 475 kópqabatty turǵyn úı jylý berý maýsymyna daıyn. Iаǵnı oblystaǵy bıýdjettik mekemeler men kópqabatty turǵyn úıler qysqy jylý berý maýsymyna saqadaı saı. Sonymen qatar turǵyndarǵa qajetti qatty otynnan da tapshylyq joq. Qazir oblys aýmaǵyndaǵy temir jol tuıyqtarynda Shubarkól kómiriniń 1 tonnasy orta eseppen 14 myń teńgeden bosatylýda. Basqarma ókili bergen málimetke súıensek, óńirdiń jalpy qatty otynǵa degen suranysy 1 mln tonnadan asyp jyǵylady. Búginge deıin sol suranystyń 60 paıyzy tasymaldanǵan. Onyń 167 myń tonnasy bıýdjettik mekemelerge jetkizilgen. Turǵyndardyń kómirge qajettiligi 732,2 myń tonna bolsa, tasymaldanǵany – 415 myń tonna. Iаǵnı 56,6 paıyzdy qurap otyr. Temir jol qoımalarynda 1 tonna kómir 11 500 den 16 500 teńge aralyǵynda satylýda. Al mazýt otyny boıynsha qajettilik kólemi – 9,6 myń tonna. Búginde 15 qazannan bastap tasymaldaý jóninde mekemelermen tıisti kelisimshart jasalǵan.
«Jalpy, oblys boıynsha 1 475 kópqabatty turǵyn úı bar, onyń 586-sy ortalyqtandyrylǵan jylýmen qamtamasyz etiledi. Barlyq úıler 100 paıyz qysqy maýsymǵa daıyn. Oblystyń jylý berý daıyndyǵyna apta saıyn jáne turǵyndardy kómir otynymen qamtamasyz etý boıynsha kún saıyn turaqty monıtorıng júrgizilýde», deıdi Ábilhan Áskeruly.
Qysqy maýsymda qaýipsizdik sharalaryn saqtaý da mańyzdy. Bul oraıda Shardara aýdany órt sóndirý beketiniń mamandary men belsendi jastar aýdan turǵyndarymen kezdesip, túsindirý jumystaryn júrgizýde. Basty maqsat – qatty jáne suıyq otyndardy paıdalaný kezinde ýlaný faktorlaryn boldyrmaý. Aýdan halqynyń 90 paıyzy qysta qatty otyndy paıdalanady. Sol sebepti qatty otynnan ýlaný jaǵdaıy týyndaýy múmkin. Shardara aýdany Tótenshe jaǵdaılar bóliminiń basshysy Qanat Sartpaevtyń aıtýynsha, byltyrǵy jylytý maýsymy kezeńinde aýdanda kómirqyshqyl gazynan ýlaný faktisi tirkelmegen. Osy turaqtylyqty saqtap qalý úshin sala mamandary kúndelikti túsindirme jumystaryn júrgizip keledi.
Al Kentaý qalasyndaǵy qazandyqta qysqa daıyndyq jumystarynyń 60 paıyzy oryndalǵan. Qalǵan jumystar 20 qazanǵa deıin tolyǵymen aıaqtalady. Osy sharýalardy atqarý úshin oblystyq bıýdjetten tıisti qarjy bólingen. Qalanyń qysqy maýsymǵa daıyndyq máseleleri oblys ákimi О́mirzaq Shókeevtiń tikeleı baqylaýynda. Turǵyndardy jylýmen qamtıtyn «Kentaý servıs» mekemesine 14 534 abonent qosylǵan. Búgingi tańda mekemede 62 tonna suıyq otyn ázirlengen bolsa, 27 myń tonnaǵa jýyq qatty otyn Kentaýǵa kelisimshart negizinde Ekibastuzdan jetkiziledi.
Túrkistan oblysy