Búgin Aqparat jáne qoǵamdyq damý mınıstri Aıda Balaeva Memleket basshysy atynan belsendi volonterler, mesenattar, blogerler men jýrnalısterdi pandemııamen kúreste qosqan úlesteri úshin "Halyq alǵysy" medalimen marapattady.
Aıda Balaeva Birgemiz respýblıkalyq aksııasy aıasynda COVID-19 taralýymen kúreske qatysqan azamattardyń úlesin atap ótip, el ómiri úshin qıyn-qystaý kezeńde úzdikter qatarynan tabylǵandary úshin alǵys bildirdi.
«Syn saǵattarda qıyndyqqa moıynsunbaı, ózderińizdiń azamattyq ustanymdaryńyzdy kórsetý arqyly, ultjandylyq tanyta bilgen Sizder elimizdiń maqtanyshysyzdar. Prezıdent qaıyrymdylyq jáne volonterlik uıymdary ókilderimen ótken onlaın kezdesýde volonterlik qozǵalystyń jalpy ulttyq masshtabqa ıe bolyp, azamattardyń kómek qolyn sozýǵa degen belsendi ustanymy áleýmettik normaǵa aınalyp bara jatqanyn atap ótti»,-dedi A.Balaeva.
Is-shara barysynda «Halyq alǵysy» medalderimen marapattalǵandar da sóz sóıledi. Atap aıtsaq, jýrnalıst jáne telejúrgizýshi Dınara Sátjan: «Keıin maǵan bireý alǵys aıtady dep oılamadym. Ol ýaqytta tek qana adamdarǵa qalaı kómek bersek degen oı ǵana boldy». Qazaqstan musylmandary dinı basqarmasynyń ortalyq apparatynyń basshysy Ǵylymbek Májıev pandemııanyń taralýymen kúres kezinde din qyzmetkerleriniń mańyzdy rólin atap ótip, memleket tarapynan kórsetilgen qoldaý úshin rızashylyǵyn bildirdi.
Aıta keteıik, Qazaqstan Respýblıkasy Prezıdentiniń 2020 jylǵy 14 qyrkúıektegi Jarlyǵymen bilim, densaýlyq saqtaý, áleýmettik qorǵaý salalarynda jemisti eńbek etip júrgen, sondaı-aq koronavırýs pandemııasymen kúreste erekshe kózge túsken 5000 astam azamat «Halyq alǵysy» medalimen marapattaldy.
2020 jylǵy 30 qyrkúıekte qaıyrymdylyq jáne volonterlik uıymdary ókilderimen ótken onlaın kezdesýde Prezıdent respýblıka kóleminde marapattardy óz ıelerine tabystaýdy tapsyrdy.
Kezekti marapattaý rásimi barysynda medalder D.Abdınge, A.Agıbaevaǵa, B.Bekkojınaǵa, M.Bektazınovke, A.Vlasenkoǵa, A.Gazalıevke, A.Gaısınaǵa, A.Gorbachevaǵa, G.Majıevke, D.Satjanǵa, R.Tıdege, Z.Shalabaevaǵa, M.Bazarbaevqa, E.Kochetovke, A.Shaǵalaqovqa tabys etildi.