О́tken aptada qaýipti indetti juqtyrǵan №1 emhana qyzmetkerleri ótemaqy almaǵanyna baılanysty alańdaýshylyǵyn bildirgen edi. Bul týraly «Egemen Qazaqstan» gazetinde (№194, 12 qazan) jazylǵan bolatyn. Emhana qyzmetkerleriniń janaıqaıy Densaýlyq saqtaý mınıstrligine jetti.
Mınıstrlik taratqan málimetke súıensek, aımaqtyq komıssııanyń sheshimimen Atyraý qalasyndaǵy koronavırýspen aýyrǵan №1 emhananyń 11 medısına qyzmetkerine áleýmettik tólem tólenetin bolyp otyr. Budan buryn atalǵan emhana qyzmetkerleri oblystyq densaýlyq saqtaý basqarmasyna áleýmettik tólemder taǵaıyndaý týraly ótinishterin qaraýdan bas tartqanyna baılanysty shaǵym aıtqan-dy. Jurt aýyryp jatqanda kásibı mindetin oryndaýdan bas tartpaǵan emhana qyzmetkerleriniń kópshiligi koronavırýspen aýyrǵan. Al oblystyq komıssııanyń qaraýyna №1 emhananyń ákimshiligi 33 medısına qyzmetkeriniń qujatyn usynypty. Onyń ishinde tek 10 ótinish qana maquldanǵan.
Endi mine, Densaýlyq saqtaý mınıstrligi men Eńbek jáne halyqty áleýmettik qorǵaý mınıstrliginiń 2020 jylǵy 10 qazandaǵy №129 birlesken buıryǵyna ózgerister engizilip otyr. Bul naýqas jáne qaıtys bolǵan medısına qyzmetkerlerine ótemaqylardy qaraý jáne taǵaıyndaý prosedýralaryn edáýir jeńildetti. Osydan keıin oblystyq komıssııa músheleri 23 adamnyń qujattaryn qaıta qarady. Alaıda 22 ótinishke dáleldi sebeppen bas tartylyp otyr. Al bir qujatqa qatysty oń sheshim qabyldandy.
Oblystyq densaýlyq saqtaý basqarmasy basshysynyń mindetin atqarýshy Ashan Baıdýálıevtiń málimetine súıensek, munaıly óńirde qaýipti indetpen aýyrǵan 1 105 medısına qyzmetkeri tirkelipti. Osyǵan baılanysty 955 qyzmetker ótemaqy alý úshin ótinish berdi. Onyń ishinde koronavırýsty juqtyrǵan 501, vırýstyq pnevmonııamen aýyrǵan 454 qyzmetker bar.
«Áleýmettik medısınalyq saqtandyrý qory» Atyraý oblysy boıynsha fılıalynyń dırektory Sábıt Quralbektiń málimetine súıensek, qyrkúıektiń qorytyndysymen 828 medısına qyzmetkerine 160,476 mln teńge kóleminde ústemeaqy tóleý josparlanyp otyr.
– Atyraý oblysynda naýryz aıynda 857 medısına qyzmetkerine 66,1 mln teńgege ústemeaqy berildi. Sáýirde 1 080 medısına qyzmetkeri 158,1 mln teńge, mamyrda salanyń 1 429 qyzmetkeri 255,35 mln teńge, maýsymda 2019 medısına qyzmetkeri 390,59 mln teńge kóleminde ústemeaqy aldy. Al shildede 2 475 aq halattyǵa 796,1 mln teńge, tamyzda 2 205 medısına qyzmetkerine 476,0 mln teńge ústemeaqy tólendi, – deıdi S.Quralbek.
Atyraý oblysy