Atyraý oblysyndaǵy Memlekettik kirister departamentiniń burynǵy basshysy aqsha bopsalady dep aıyptalyp, 10 jylǵa bas bostandyǵynan aıyryldy. Bul týraly Atyraý qalasyndaǵy № 2 sotynyń baspasóz qyzmeti habarlaıdy, dep jazady Egemen.kz
Sot úkimdi 13 qazanda shyǵarǵan. Sot sottalýshynyń laýazymdy tulǵa bola otyryp, tártiptik sıpattaǵy sharalardy qabyldamaǵany úshin qolastyndaǵylardan bopsalaý arqyly 3 myń dollar para alǵanyn anyqtady. Qabyldanǵan antty buzý aýyrlatatyn jaǵdaı dep tanyldy.
"Jasalǵan sybaılas jemqorlyq qylmystyń aýyrlyǵy men sıpatyn, sondaı-aq sottalýshynyń jasaǵan isine ókinbegenin eskere otyryp, sot bas bostandyǵynan aıyrýdy taǵaıyndaýdy ádil sheshim dep tapty", delingen habarlamada. Ázirge sot úkimi zańdy kúshine engen joq.