Jeńilisten kóz ashpaǵan jastar quramasy

Jastarymyzdyń Ispanııa órenderinen jeńilip qalǵany biz úshin pálendeı jańalyq emes jáne bul jeńilis otandyq fýtbol mamandary men jankúıerlerdiń júıkesine túk te áser ete qoıǵan joq. Deı turǵanmen, 1-taımdaǵy bizdiń fýtbolshylardyń alań­daǵy oıyny eń quryǵanda teń nátı­jege qol jetkizýge bolady-aý degen úmit syılaǵany jasyryn emes. Match aldyndaǵy bas­pasóz máslıhatynda bas bap­ker Almas Qulshynbaev shákirt­teriniń bas salyp alǵa qaraı umtylmaıtynyn, áıtse de qor­ǵana otyryp qarsy shabýylǵa ıek artatynyn aıtqan edi.

Alańǵa shyqqan 11 fýtbolshymyz alǵashqy taımda bapkerdiń tapsyrmasyn buljytpaı oryndap shyqty. Iаǵnı Ispanııanyń kez kelgen shabýylyna toıtarys berip, ózderi ońtaıly sát týǵanda jyldam qarymta shabýy­l uıymdastyrdy. Nátıjesinde kezdesýdiń alǵashqy mınýttarynda jerlesterimiz Ispanııa qura­masynyń qaqpasyna bir ret qaýipti soqqy jasap, eki ret buryshtama dobyn oryn­daý­ǵa múmkindik aldy. Bul kez­de matchtyń alǵashqy 15 mınýty artta qalǵan edi. Ekin­­shi buryshtamadan keıin jas­tary­myzdyń gol soǵatyn tamasha múm­kindigi bolǵanymen qor­ǵaý­shy Álibek Qasym óz múm­kin­digin sátti paıdalana almady. Qazaq­stan quramasynan mun­daı qar­qyn­dy kútpegen ıspa­nııa­lyq­tar oıynnyń keı sátterinde qor­ǵa­nysqa kóńil bólýge májbúr boldy.

Jalpy, 1-taımda bizdiń ji­git­ter jaman óner kórsetken joq. Dopqa ıelik etý boıynsha da jas­tarymyz Ispanııadan qalyspady, ol boıynsha paıyzdyq kór­setkish – 55:45. Ádette azýly qar­sy­las­tarmen oınaǵanda Qazaqstan quramasynyń dopqa ıelik etý kórsetkishi 40 paıyzdan aspaıtyn. Osylaısha kezdesýdiń al­ǵashqy taımynda qarsylastar bir-biriniń qaqpasynan sańylaý taba almaı, úziliske teń nátı­jemen shyqty.

2-taımda da Qazaqstan jastary alǵashqy 45 mınýttaǵy oıynyn kórsetedi dep úmittengen bolatynbyz. Alaıda álemde fýtbol derjavasy retinde moıyndalǵan Ispanııa aıaqdop ónerinde ázirge eshqandaı jetistigi joq Qa­zaq­stan quramasyna bir taım boıy gol soǵa almaı áýrelengenine na­mys­tanǵan bolýy kerek, aı­naldyrǵan 20 mınýtta qaqpa­myzǵa bir emes, úsh gol soǵyp ketti. 2-taımnyń alǵashqy 20 mınýtyna deıin alynbas qamalǵa aınalǵan Qazaqstan qorǵanysy dál osy ýaqytta syr bere bas­tady. Standartty jaǵdaıdy tıimdi paıdalanǵan «Sevılıa» qorǵaýshysy Ýgo Gılıamon Sanmartın 65-mınýtta esep ashyp, Ispanııany alǵa shyǵardy.

Alań qojaıyndarynyń ekinshi goly da kóp kúttirgen joq. 2-taımda oıynǵa tyńnan qosylǵan «Levante» shabýylshysy Danıel Gomes 71-mınýtta esepti eselep, tablodaǵy kórsetkishti 2:0-ge jetkizse, arada 14 mınýt ótkende dýbl avtory atanyp, kezdesýdiń núktesin qoıdy. Alǵashqy eki gol soǵylǵanda dopty qaıtarý bylaı tursyn, dopqa umtylýǵa shamasy jetpegen qaqpashymyz Bekhan Shaızada bul joly dop­ty qaıtarýǵa tyrysqanymen, onysynan túk shyqpady. Sóı­tip, oıyndy sátti bastaǵan jer­lesterimiz match sońynda azýly qarsylastaryna esh dármen kór­sete almaı, 3:0 esebimen jeńilýge májbúr boldy.

Endi Qazaqstan jastar qura­masy 2021 jylǵy Eýropa chem­pıonatynyń irikteý kezeńindegi soń­ǵy matchyn óz alańymyzda Farer araldary fýtbolshylarymen ótkizedi. Kezdesý 17 qarashaǵa josparlanǵan. Eki qurama arasyndaǵy alǵashqy oıyn 2019 jyldyń maýsym aıyn­da Farer araldarynda ótip, jerlesterimiz syrt alańda 3:1 esebimen jeńiske jetken edi.