Qurlyqtyq hokkeı lıgasynda óner kórsetetin elordanyń «Barys» klýbynyń keıingi bes oıynynda 3:2 esebi tirkelip júr. Qazaqstandyq komandanyń kezdesýlerin qalt jibermeı, únemi baqylap otyratyn jankúıerler bul statıstıkany jaqsy bilýi kerek. 4 qazanda bastalǵan dástúrli eseptiń áli kúnge deıin murty buzylmaı kele jatyr. 3:2 esebimen aıaqtalǵan bes oıynnyń úsheýinde «Barys» klýby jeńiske jetse, ekeýinde qarsylastaryna ese jiberdi.
QHL-diń kezekti týrynda Máskeýge sapar shekken jerlesterimiz «Spartak» klýbynan overtaımda ádettegideı 3:2 esebimen basym tústi. Básekeniń alǵashqy 20 mınýty «Spartaktyń» basymdyǵymen ótti. Kezdesýdiń tórtinshi mınýtynda aıdyn ıeleriniń oıynshysy Sergeı Shırokov mergendigimen kózge túsip, komandasyn esepte alǵa shyǵardy. Úzilisten keıin tyń kúshpen muzaıdynǵa shyqqan jerlesterimiz aınaldyrǵan úsh mınýtta qarsylas komandanyń qaqpasyna qatarynan eki shaıba engizdi. Bul goldardyń avtorlary – Nıkıta Mıhaılıs (20 mınýt) pen Darren Dıs (23 mınýt). Al úshinshi kezeńde komandalar bir-biriniń qaqpasyna gol soǵa almady. Negizgi ýaqytta jeńimpaz komanda anyqtalmaǵan soń oıyn overtaımǵa ulasty.
Qosymsha ýaqyt bastalǵan sátte qarsylastyń qateligin utymdy paıdalanyp, shaıbaǵa ıelik etken komanda kapıtany Darren Dıs nysanany dál kózdep, «Barysqa» jeńis syılady. Bul Dıstiń oıyndaǵy ekinshi goly bolatyn. Esep – 2:3.
11 oıynnan keıin 13 upaı jınaǵan «Barys» klýby QHL-diń «Shyǵys» konferensııasyndaǵy týrnır kestesinde toǵyzynshy orynǵa jaıǵasty. «Spartak» ta 13 upaımen «Batys» konferensııasynda toǵyzynshy orynǵa turaqtady. «Barys» kelesi kezdesýin búgin Qazan qalasynda jergilikti «Aq Bars» komandasymen ótkizedi.