Álemge jaıylǵan koronavırýs pandemııasynyń saldarynan sporttyq jarystar jankúıerlersiz ótip jatqany belgili. Alaıda keıingi ýaqytta jankúıerler sport keshenderine orala bastady.
Máselen, ÝEFA kúni keshe Ulttar lıgasy aıasynda ótken matchtarǵa jankúıerlerdiń kirýine ruqsat berdi. Tek jankúıerlerdiń sany 30 paıyzdan aspaýy kerek degen shartpen. Fýtbol jankúıerleri stadıonǵa oralǵan soń, ózge sport túrleriniń basshylary da sporttyq jarystaryn jankúıerlerdiń qatysýymen ótkizýdi josparlap otyr. Onyń ishinde aralas jekpe-jek sporty da bar.
24 qazanda BAÁ-niń «Jaýyngerler aralynda» kezekti UFC 254 dodasy ótetini barshaǵa málim. Osyǵan oraı UFC sportynyń Taıaý Shyǵystaǵy marketıng dırektory Rashıd Ál-Saıd qazirgi tańda atalǵan básekege jankúıerlerdi kirgizý boıynsha kelissóz júrgizip jatqanyn málimdedi. Týrnırdiń basty jekpe-jeginde reseılik Habıb Nýrmagomedov pen amerıkalyq Djastın Getjı aıqasady. Sonymen qatar sol keshte qazaqstandyq sportshylar Shavkat Rahmonov pen Sergeı Morozov UFC-daǵy debıýtti aıqasyn ótkizedi.