Aýyl sharýashylyǵy mınıstri Saparhan Omarov Qazaqstanda qus tumaýynan 870 myńnan astam bas ólgenin aıtty, - dep habarlaıdy Tengrinews.kz.
Mınıstr eldegi qus tumaýynyń jaǵdaıy týraly tolyǵyraq aıtty. Onyń aıtýynsha, Qazaqstan 2005 jyldan bastap bul aýrýdan qaýipsiz dep sanalady.
"2020 jyldyń 22 qyrkúıegi men 19 qazany aralyǵynda jeti oblysta qustardyń ólimi tirkelgen. Jeke fermalarda 26,5 myń bas, úsh qus fabrıkasynda 847,4 myń bas qus ólgen. Buǵan aýrýdyń rastalǵan jaǵdaılary men aýrý kúdigi bar oryndar kiredi. Osylaısha, joǵary patogendi qus tumaýynan jalpy 873,9 myń bas óldi, bul jalpy qustar sanynyń 1,9 paıyzyn quraıdy", dedi Omarov.
Onyń aıtýynsha, qustardyń ólimi bastalǵannan beri mınıstrlikte jáne aımaqtarda jedel shtab qurylyp, kún saıyn kezdesýler ótkizilip turady.
"Infeksııanyń ár baǵytyna karantın engizilip, qustar men qus ónimderin ákelýge jáne áketýge tyıym salyndy, joıý jáne dezınfeksııalaý kezinde ınfeksııa oshaqtaryn lokalızasııalaý jáne joıý boıynsha sharalar qabyldanýda.Qustardy májbúrli vaksınasııalaý úshin veterınarııalyq preparattardyń respýblıkalyq qorynan qus tumaýyna qarsy qosymsha 4,4 mıllıon doza vaksına bólindi", dep tolyqtyrdy mınıstr.
Omarov qazir barlyq jeti oblystaǵy jeke qosalqy sharýashylyqtarda ólim toqtatylǵanyn, al úsh qus fabrıkasynda qustardyń ólimi azaıǵanyn aıtty.
Qazir mınıstrlik tarapynan naýqastardy joıý jáne olardyń ıelerine shyǵyndardy óteý jumystary júrgizilýde.