Memleket basshysynyń tapsyrmasy boıynsha quqyq qorǵaý organdary COVID-19 pandemııasy kezinde dári-dármekterdi alyp-satýdyń jáne zańsyz aınalymǵa túsirýdiń jolyn kesý jumystaryn júrgizdi, dep habarlady akorda.kz.
Dárihanalarda medıkamentterdi qymbat baǵada satýǵa qatysty 1 myńǵa jýyq derek tirkeldi. Mysaly, Batys Qazaqstan oblysyndaǵy dárihanalardyń birinde «Arbıdol» dárisiniń baǵasy shekti deńgeıden eki ese joǵarylatylyp, bekitilgen 2312 teńgeniń ornyna 5000 teńgeden satylǵan.
Sonymen qatar dárihanalardan tys jerlerde qaýipsizdik lısenzııalary men sertıfıkattary joq dári-dármekter men medısınalyq buıymdardy zańsyz satýǵa qatysty 300-den astam jaǵdaı anyqtaldy. Sonyń ishinde, Jambyl oblysynda dári-dármekterge jalǵan qaýipsizdik sertıfıkaty jasalǵan jáne farmasevtıkalyq qyzmetke lısenzııasy joq quny 44 mıllıon teńge bolatyn Qyrǵyzstannan ákelingen 82 preparat túrin satýǵa tosqaýyl qoıyldy.
Jalpy, zańsyz aınalymnan quny 230 mıllıon teńgeden asatyn 10 mıllıon býma dári-dármek pen medısınalyq buıym tárkilendi. Anyqtalǵan zań buzýshylyq derekter boıynsha 3 sotqa deıingi tergeý amaldary júrgizilýde jáne 1183 adam ákimshilik jaýapqa tartylǵan.
Densaýlyq saqtaý mınıstrligi dári-dármekterdiń bólshek saýdadaǵy shekti baǵasyn qoıý úshin olardyń tizimin tolyqtyrý máselesin pysyqtaýda. Sonymen qatar medısına qyzmetkerlerine ústemeaqy tóleý kezinde bolatyn zań buzýshylyqtardy anyqtaýǵa qatysty keshendi sharalar jalǵasýda.
Júrgizilip jatqan jumystar men qylmystyq isterdiń tergelýi Qaýipsizdik Keńesi Apparatynyń qatań baqylaýynda.