Jýyrda Nazarbaev Ýnıversıtetiniń joǵary memlekettik saıasat mektebi Lı Kýan Iý memlekettik saıasat mektebi jáne Astana memlekettik qyzmet habymen áriptestikte «Ortalyq Azııadaǵy ornyqty damý maqsattary jáne COVID-19 syn-qaterleri» taqyrybynda jyl saıynǵy tórtinshi konferensııasyn ótkizdi.
Onlaın formatta alǵash ret uıymdastyrylǵan konferensııaǵa Qazaqstan, О́zbekstan, Qyrǵyzstan, Grýzııa, Reseı, Ulybrıtanııa, Túrkııa, Grekııa, Italııa, Kanada, Slovenııa, Sıngapýr, Izraıl jáne AQSh zertteýshileri, ǵalymdary, sarapshylary, memlekettik qyzmet praktıkteri jáne stýdentter qatysty.
Nazarbaev Ýnıversıtetiniń professory Ilesanmı Adesıda konferensııa barysynda keńinen talqylanǵan jańa syn-qaterler jaǵdaıynda Ortalyq Azııa elderiniń turaqty damý maqsattaryna baılanysty máseleler óńir elderi úshin ǵana emes, jalpy jahandyq qoǵamdastyq úshin de paıdaly bolatynyn atap ótti.
– COVID-ten keıingi álemde, buryn-sońdy bolmaǵan, aqylǵa qonymdy saıasat pen durys basqarý qajettiligi odan saıyn kúsheıe túsedi. О́ıtkeni úkimetter men qoǵamdar anyqtalǵan júıelik olqylyqtardy joıý úshin saıası tańdaý jasaıdy. Esep beretin júıelerdi, beıimdeletin ınstıtýttardy, sondaı-aq tehnologııalyq jáne sıfrly ınnovasııalarmen úılesken azyq-túlik, sý, energetıka, medısına, kólik jáne qalalyq júıelerdiń qaýipsizdigi men turaqtylyǵyn qurý úshin saıası oılaý men tájirıbeni ózgertý qajet. Dástúrli konferensııa Ortalyq Azııadaǵy turaqty damý maqsattaryna jáne COVID-19 syn-qaterlerine, problemalar men múmkindikterge nazar aýdarý úshin, sondaı-aq COVID kezinde jáne odan keıin álemdegi turaqty damý maqsattarynyń ártúrli aspektilerine qol jetkizýge únemi umtylýǵa arnalǵan, – dedi joǵary memlekettik saıasat mektebiniń dekany Veng Tat Hýeı.
Astana memlekettik qyzmet habynyń basqarýshy komıtetiniń tóraǵasy Álıhan Báımenov pandemııadan týyndaǵan daǵdarysqa jaýap retinde úkimetter negizinen resýrstardy qysqa merzimdi bólý turǵysynan jedel sheshimder qabyldaıtynyn atap ótti.
– Osy jyldam sheshimder tabý jarysynda turaqty damýdyń uzaqmerzimdi maqsattary nazardan tys qalmaıtynyna kóz jetkizý mańyzdy. Aýyr qysymǵa ushyraǵan búkil álemdegi úkimetter jan-jaqty jáne barabar sharalar qabyldaýda belgili bir tájirıbe jınaqtady. Onyń ishinde Ortalyq Azııa elderi de bar. Alaıda kórip otyrǵanymyzdaı, bul pandemııamen kúresýdiń ámbebap modeli joq. Sondyqtan ozyq tájirıbeni taratýda barlyq sektorlar men múddeli taraptar arasyndaǵy jahandyq yntymaqtastyq pen tıimdi áriptestikti nyǵaıtý mańyzdy, – dedi Á.Báımenov.
Sonymen qatar konferensııanyń negizgi spıkerleri qatarynda Grekııa, Afıny ekonomıka jáne bıznes ýnıversıteti Ekonomıka mektebiniń turaqty damý kafedrasynyń meńgerýshisi Fıb Kýndýrı jáne Sıngapýr ulttyq ýnıversıtetiniń professory Vınod Tomas sóz sóıledi.
Konferensııa barysynda qatysýshylar, onyń ishinde jas ǵalymdar óz zertteýleriniń nátıjelerimen, bilimderi men tájirıbelerimen bólisti, sondaı-aq ózderiniń áriptestik baılanystaryn keńeıtýge jáne nyǵaıtýǵa múmkindik aldy.