Dana halqymyz densaýlyqtyń qadir-qasıetin «Qyryq tistiń qadirin qaqsaǵanda bilersiń, qos aıaqtyń qadirin aqsaǵanda bilersiń» dep fılosofııalyq shýmaqpen órip, bir túıgen eken. Sál tarqatyp aıtar bolsaq, densaýlyq adamǵa úzdiksiz jutatyn kádimgi aýa sekildi asa qajet faktor. Iаǵnı densaýlyq bar kezde onyń qajettiligin tereń sezine bermeımiz, oǵan qalypty bolýǵa tıisti dúnıedeı qaraımyz.
Joǵaryda aıtylǵandaı, aǵzanyń bir múshesi syr bere qalsa ǵana medısına qyzmetkerlerinen kómek suraýǵa májbúr bolamyz. Osy qatarda dárigerler, medbıkeler jáne medısına mekemeleriniń ózge de ókilderi bar ekeni belgili. Myńdaǵan adamdardyń ómirine arasha túsip júrgen aq halatty abzal jandardyń eńbegi shyn mánindegi uly is dep ataýǵa ábden laıyqty.
Solardyń biri – «Býrabaı» respýblıkalyq ońaltý ortalyǵy» RMK medbıkesi Tamara Qametova. Sońǵy ýaqytta ókpe jáne ózge de tynys músheleri dertine tap bolǵandar jıi kezdesedi. Ony tolyq jazyp, emdeý eki kezeńnen turady eken. Bul baǵytta ońaltý satysynyń atqaratyn róli óte joǵary. Osy rette Tamara Túsipbekqyzy úlken men kishiniń, naqtyraq aıtqanda, balalar men jasóspirimderdiń ári egde jastaǵy adamdardyń jaı-kúıin barometrdeı baqylaı alatyn óz isiniń shynaıy sheberi ekenin aıtýǵa tıispiz. Onyń uzaq jyldan beri jınaqtaǵan baı tájirıbesi ózge áriptesterine úlgi-ónege bolarlyqtaı. Adamdardyń jaratylysy men bitim-bolmysy jáne derttiń paıda bolýy men taralý joldary birine-biri múlde uqsamaıdy. Qansha aǵza bolsa, sonsha túrli erekshelik bolýy jazylmaǵan zańdylyq sekildi. Naýqastyń kóńil-kúıiniń qalypty bolýy ońaltý sharalarynyń nátıjeli bolýynyń basty bir kepili. Bul turǵyda búgingi áńgimemizdiń keıipkeri emdeýshi dárigermen ózara kelisip, aqyldasa otyryp árkez olardyń babyn tabýǵa umtylys jasap júrgeni súısindiredi. Densaýlyq saqshylary dáriniń nemese búgingi zamanaýı medısınalyq qural-jabdyqtardyń kómegimen ǵana emes, júrek jylýymen jáne jyly shyraıly qarym-qatynasymen de em alýshylarǵa dem bere alady. Mundaı bıik adamgershilik qasıet Tamaranyń boıynda ejelden qalyptasqanyn ujym músheleri men ońaltý kezeńinde bolǵandar jıi aıtady.
Taǵy bir baıqaǵanymyz, Tamaranyń qaı kezde de óz qyzmetine bıik talap údesinen qaraı biletindigi, kásibı sheberligin odan ári ushtap, jetildirip otyrýǵa udaıy qam-qareket jasaýǵa ázir turatyny. Jańany úırený qaı kezde de, tipti zeınet jasyna jetken ýaqytta da keshtik etpeıtinin Tamara Túsipbekqyzynyń tabandy is-qımyly arqyly taǵy bir aıqyn túısingendeı boldyq. Mine, ol talap pen jan jylýyn osylaısha bir-birimen ushtastyryp keledi. О́z tájirıbesin keıingi jas býyn, orta medısına qyzmetkerlerimen udaıy bólisip júrgeni de onyń adamı bitim-bolmysyn bıiktete túsedi.
Densaýlyq saqtaý isiniń úzdigi, sonymen birge ónegeli otbasynyń uıytqysy, adal jar, asyl ana Tamara Qametovanyń orta býyn medısına qyzmetkeri retinde ońaltý qyzmetinde jınaqtaǵan baı tájirıbesi bul saladaǵy ortaq iske qosylǵan súbeli úles bolyp sanalady. Qaı kezde de em alýshylarǵa janashyrlyq tanytyp, olardyń jandarynan tabyla bilgen Tamaranyń juldyzy joǵary bola bereri talassyz.
Temir QUSAIYN,
«Egemen Qazaqstan»
Aqmola oblysy,
Býrabaı aýdany