Soltústik Qazaqstan oblysynyń ákimi Qumar Aqsaqalov jaman indettiń ekinshi tolqynyna baılanysty Instagram jelisi arqyly oblys turǵyndaryna úndeý jarııalady, dep habarlaıdy Egemen.kz.
Aldymen ol búkil álemde vırýs juqtyrǵan adamdardyń sany kún saıyn ósip bara jatqanyn aıtty. "Sonyń ishinde bizdiń oblys ta bar. Bizdegi naýqastar kóbeıgen 10 eldi-mekende shekteý sharalary engizildi. Monıtorıng toptarynyń jumysy kúsheıtildi. Kún sýyp, maýsymdyq aýrýlar bastalsa, vırýspen kúres qıyndaı túsýi múmkin", dedi ol. Odan ári ákim turǵyndardy jergilikti bıliktiń basshylyǵymen densaýlyq oryndarynyń ekinshi tolqynǵa daıyndyǵy týraly habardar etti. "Aýrýhanalarda dárilerdiń 2 aılyq qory bar. Dárihanalar preparattarmen 1 aıǵaqamtamasyz etildi. Barlyǵy 3400 tósek oryn daıyn tur, ókpeni jasandy tynystandyrý apparattarynyń sany aldyńǵy tolqyndaǵydan 3 ese, ıaǵnı 73-ten 232-ge deıin, ottegi konsentratory 6 ese, ıaǵnı 56-dan 362-deıin ulǵaıdy", dedi Q.Aqsaqalov.
Osy qazan aıynyń sońynda oblysta jańa ınfeksııalyq aýrýhananyń qurylysy aıaqtalady. Onda PSR zerthanasy iske qosylady. Bul óńirdegi besinshi zerthana bolmaq. Osynyń arqasynda kúnine 3 myń testjasaýǵa qol jetkiziledi. Bıýdjet esebinen 5 ottegi stansııasy ashylady. Jedel járdem avtoparki 18 jańa reanımobılmen tolyqty. "Qarasha aıynda osyndaı taǵy 20 kólik satyp alamyz. Jyl sońyna deıin 111 ókpeni jasandy tynystandyrý apparaty, 8 kóshpeli medısınalyq keshen men 6 rentgen apparaty keledi", dedi ákim.
О́ziniń úndeýinde ákim jergilikti densaýlyq oryndarynyń ekinshi tolqynǵa qarsy kúresýge daıyn bolǵanymen adamdardyń ózderi de saqtyqty umytpaýlary kerektigin eskertti. "Árbir naýqastyń fızıologııalyq derekteri ártúrli, dárigerler olardy hattamaǵa saı emdegenimen árbir aǵzanyń vırýspen kúresý múmkinshiligi ártúrli bolady. Birde-bir maman emdeý sharalarynyń qanshalyqty tıimdi bolatynyn aıta almaıdy. Aýyrǵandardyń jartysynda pnevmonııa bolady. Keıbireýler ony jeńe almaýy múmkin. Sondyqtan árbir adam aldymen ózi jeke saqtyq sharalaryn qatań saqtaýlary kerek", dedi ol.
Jaman indettiń zardaby bastalǵannan beri oblysta 4326 adam dertke ushyraǵan eken. Az ǵana ýaqytta tórt myń taǵdyr aýrýmen alysqan. Sonymen qatar olardyń birneshe myń jaqyndary jaqynyn joǵaltyp alamyz ba dep qasyret shekken. Sonyń bári kútiný sharalaryn múltiksiz saqtaý kerektigin eskertedi.
"Biz jaz boıy indetti jeńýmen aınalysqan dárigerlerge alǵys aıtýymyz kerek. Olar óte kúrdeli jaǵdaıda talmaı jumys istedi. Tipti beti ári qarap qalǵan adamdardy da ajaldyń tyrnaǵynan aman alyp qaldy. Olardyń arasynda qos ókpesi 90 paıyzǵa deıin zaqymdanǵan adamdar da kezdesti. Dárigerler ózderiniń kásibı sheberligin kórsetip, osyndaı jerlesterimizdi de ajaldan qutqardy", dedi Qumar Irgebaıuly.
Osy ýaqytqa deıin elimizde 12 myń medısınalyq qyzmetkerler vırýs juqtyrdy. Sonyń ishinde 182 dáriger kóz jumdy. Osy faktilerdi keltirgen ákim olardyń óte qaterli jaǵdaıda bolǵanyna nazar aýdardy. Dáriger qaýymynyń ózi osyndaı qysastyqqa tap bolyp jatqanda qarapaıym adamdardyń saqtyǵy tipti arta túsýi qajettigin ol taǵy da eskertti. Sonymen qatar ol keıbireýlerdiń vırýstyń qasiretine áli de senbeıtinine ókinish bildirdi. "Búkil álem pandemııadan zardap shegip jatqanda qulaq pen kózge senbeý – ábestik. Mundaı qylyqpen olar tek ózine, otbasyna jáne qorshaǵan adamdarǵa qaýip tóndiredi. Al vırýspen aýyryp qalǵan kezde, basqasha sóılep, barlyǵyn túsine bastaıdy. Osyǵan kóz jetkizý úshin mindetti túrde vırýs juqtyrý kerek pe", dedi ol.
Árıne, mundaı jaǵdaıǵa jetkizbegen durys. Bar bolǵany, saqtyq sharalaryn qoldaný kerek. Onyń esh qıyndyǵy joq. Tek betperde taǵyp, qoldy jýyp júrý kerek. Sonymen qatar qashyqtyqty saqtaýdy umytpaǵan jón. Kóp adam jınalǵan jerge barýdan da tartylǵan durys. "Qazir toı jasap, kóp adamdy shaqyrýǵa tyıym salynǵan. Aǵaıynnyń ómiri men densaýlyǵyna qaýip tónýi múmkin. Vırýs qarııalarǵa jáne sozylmaly aýrýy bar adamdarǵa asa qaýipti. Ata-ájelerimizdi, densaýlyǵy shalaǵaı jaqyndaryńyzdy qorǵap júrińizder", delingen ákimniń úndeýinde. Sóziniń sońynda Qumar Aqsaqalov barlyq soltústik qazaqstandyqtarǵa:
"Sanıtarlyq talaptardy oryndaý men tártiptiń arqasynda kóktemde vırýspen kúres tıimdi boldy. Alaıda, jazǵy ýaqytta jaǵdaı qıyndap ketti. Sondyqtan, ár azamattyń jaýapkershilik tanytyp, tártipke baǵynǵany jón. Barlyqtaryńyzdy bul iske túsinistikpen qaraýǵa shaqyramyn", dedi.
Soltústik Qazaqstan oblysy