Segizinshi maýsymyn dárigerlerdiń qurmetine úsh qaıyrymdylyq konsertpen ashqan soń, "Astana Balet" teatrynyń ártisteri úsh premeralyq spektaklge daıyndyǵyn jalǵastyrdy. Olardyń kórsetilimi 30-qazan men 6 qarashada ótedi. Jańa maýsymdaǵy spektaklderge bılet satyla bastady. Ol tek teatr saıty arqyly onlaın júzege asyrylady, dep habarlaıdy Egemen.kz
30 qazanda kórermen qaýym qos premerany tamashalaıdy. Bir keshte teatr sahnasynda shaqyrylǵan horeograf Rıkardo Amaranteniń jańa týyndysy – "Longing" ("Qushtarlyq"), sonymen birge, Devıd Djonatannyń "Instinct" ("Instınkt") bir aktili baleti kórsetiledi.
Rıkardo Amarante qazaqstandyq kórermenge birshama tanys: onyń qoıylymdary teatrdyń konserttik jáne gastroldik baǵdarlamalarynda turaqty túrde kórsetiledi. Argentınalyq kompozıtorlar Astor Pıassolla men Pablo Sıglerdiń mýzykasyna qoıylǵan tyń týyndysy - "Longing" baletinde kórermen qaýym qımylmen órilgen emosııanyń tolqyny men kórkemdik bezendirýdegi mınımalızmge kýá bolady. Bul týyndysynda baletmeıster: "osy ómirden, mahabbattan, jalpy, ózara qarym-qatynasymyzdan, shyn máninde, ne qalaımyz?" degen suraqtyń jaýabyn izdegendeı. Áıtse de, osy taqyrypty qozǵaı otyryp, ol birjaqty jaýap bermeı, kórermenniń óz betinshe oı qorytýyna múmkindik beredi.
Teatrdyń jetekshi solısti Devıd Djonatan úshin, "Instinct" "Astana Balet" Teatryna arnap qoıǵan alǵashqy baleti. Buǵan deıin, ol baletmeıster retinde Avstralııanyń Batys baleti men Flandrııa Koroldik baletiniń trýppalarymen shyǵarmashylyq áriptestik ornatqan. Horeograftyń aıtýynsha, baletti jasaý ıdeıasy bir jyl buryn paıda bolǵanymen, qazirgi tańda ózektiligi arta túsken.
"Pandemııa balettiń ıdeıasyna erekshe áser etti. Karantın kezinde qandaı kúı keshkenimizdi aıtamyn. Lıbrettoda da osy jaıly jazdym: kóptegen adamdar ózderiniń jaqyn týystarymen, súıikti jandarymen kezdese almady. Osy sezim, bir bolýǵa degen umtylys erekshe mańyzǵa ıe. Balettiń aty "Instınkt", sebebi, osy pandemııa men lokdaýn kútpegen jerden oryn alyp, bizdiń ınstınktıvti ádetterimiz ózgeriske ushyrady. Osy jaıly oılar meni mazalady. Biz burynǵydaı ómir súre almadyq, biraq, báribir ómir súrýimiz kerek edi", deıdi Devıd Djonatan.
Al 6 qarashada kórermen qaýym taǵy bir premerany tamashalaıdy. Astanalyq teatr sahnasynda qazaqstandyq horeograf Anvara Sadyqovanyń "Jeltorańǵy týraly ańyz" bir aktili baleti kórsetiledi. Qýat Shildebaevtyń mýzykasyna qoıylǵan balet jeltorańǵy aǵashy jaıly baıan etedi.
Spektakl premeralary Qazaqstan Respýblıkasy Mádenıet jáne sport mınıstrliginiń qoldaýymen júzege asyrylady.