Mańǵystaýda salynyp jatqan jol qurylystary týraly áńgime kóp. Beti jyltyraǵanmen, salynyp jatqan joldardyń sapasy syn kótermeı tur. «Parsy kilemi» dep atalǵan joldardy asfaltimen qosyp tutas sypyra kóterip alýǵa bolatyn bolsa, gaz ótkelin qaq ortaǵa alyp, sardııa qalǵan túpqaraǵandyq dańǵyldyń jyry jelilerge júk boldy.
Sóıtsek, jumysy da, jyry da bitpeıtin joldar kóldeneń tabys tabýǵa da qolaıly sekildi.
Mańǵystaý oblysy boıynsha Sybaılas jemqorlyqqa qarsy is-qımyl departamenti «Jumyspen qamtýdyń jol kartasy-2020» memlekettik baǵdarlamasy sheńberinde júzege asyrylyp jatqan Munaıly aýdanyndaǵy aýylishilik joldardyń qurylysyna qatysty tekseris júrgizdi. Tekseris nátıjesinde «Munaıly aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldar bólimi» memlekettik mekemesiniń basshysy qamqorlyq jasaǵany úshin zańdy tulǵadan 1 mıllıon teńge kóleminde para alý faktisi boıynsha sotqa deıingi tergep-tekserý júrgizýde.
Atalǵan departamenttiń málimetine súıensek, sotqa deıingi tergep-tekserý barysynda kúdikti qylmystyq quqyqbuzýshylyq jasaǵany úshin kinásin moıyndaǵan.
Sybaılas jemqorlyqqa qarsy qyzmet, Mańǵystaý oblysynyń prokýratýrasy jáne azamattyq qoǵam tarapynan birneshe ret synǵa ushyraǵan bul qurylys nysandary Mańǵystaý óńirinde úlken taqyrypqa ózek boldy. Atap aıtqanda, Munaıly aýdanyndaǵy joldardy salý kezindegi sapasyz jumystar faktileri týraly áleýmettik jelilerde jáne buqaralyq aqparat quraldarynda jarııalanǵan bolatyn. Sóıtsek, shala istiń artynda kóleńkeli tustar da joq emes eken.
Mańǵystaý oblysy boıynsha Sybaılas jemqorlyqqa qarsy is-qımyl departamenti iske qatysty basqa aqparattardy tergeý múddesi úshin jarııa etpeı otyr. Al kúdiktige qatysty onyń kinásiniń dárejesin anyqtaıtyn sońǵy sheshimdi sot shyǵarady.
Sapaly jol qurylysynyń bolmaýy astarynda qaltanyń qamyn kúıttegen qulqyn men aran tur eken. Azamattardyń qulqyn qurdymǵa, aran apanǵa qulatyp tynatynyn eskermeıtini qyzyq.
Mańǵystaý oblysy