Senattyń Qarjy jáne bıýdjet komıtetiniń keńeıtilgen otyrysynda depýtattar "Qazaqstan Respýblıkasynyń Ulttyq qorynan 2020-2022 jyldarǵa arnalǵan kepildendirilgen transfert týraly" zańǵa ózgerister engizý týraly" zań jobasyn talqylady, dep habarlaıdy Egemen.kz Parlament Senatynyń baspasóz qyzmetine silteme jasap.
Komıtet tóraǵasy Olga Perepechına zań jobasynda Ulttyq qordan 2020 jylǵa arnalǵan respýblıkalyq bıýdjette 4 770 mlrd teńge somasynda kepildendirilgen transfert mólsheri belgilengenin habardar etti.
Senatorlardyń aıtýynsha, zań jobasy memlekettik kirister men shyǵystardyń turaqtylyǵyn qamtamasyz etýge múmkindik beredi, bul bıýdjettik ınvestısııalyq jobalardy iske asyrýǵa jáne el ekonomıkasy damýynyń boljamdy kórsetkishterine qol jetkizýge yqpal etedi.
Komıtet otyrysynda "2020-2022 jyldarǵa arnalǵan respýblıkalyq bıýdjet týraly" Qazaqstan Respýblıkasynyń Zańyna ózgerister men tolyqtyrýlar engizý týraly" zań jobasy da qaraldy.
Senat depýtattary koronavırýsqa qarsy kúres, ekonomıkalyq turaqtylyqty qamtamasyz etý, "Nurly Jol" jáne "Nurly jer" memlekettik baǵdarlamalary aıasynda ekonomıkanyń naqty sektoryn qoldaý, agroónerkásip keshenin damytý jáne ındýstrııalyq-ınnovasııalyq damý jónindegi sharalardy qarjylandyrý úshin respýblıkalyq bıýdjetti naqtylaý júzege asyp jatqanyn aıtty.
Qarjy jáne bıýdjet komıteti osy zań jobalaryn Palatanyń qaraýyna jiberdi.