Qazaqstan Prezıdenti Qyrǵyz Respýblıkasynyń Syrtqy ister mınıstri Rýslan Qazaqbaevty qabyldady, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev Qazaqstanǵa jumys saparymen kelgen Qyrǵyz Respýblıkasynyń Syrtqy ister mınıstri Rýslan Qazaqbaevty qabyldady.
Memleket basshysy eki el arasyndaǵy ózara is-qımyldardyń deńgeıin joǵary baǵalady.
– Qazaqstan men Qyrǵyzstan eń jaqyn memleketter. Bizdi bólip turǵan eshteńe joq, kerisinshe elderimizdi biriktirýshi faktorlar óte kóp. Qazaqstan úshin Qyrǵyzstan – senimdi odaqtas, mańyzdy strategııalyq seriktes jáne baýyrlas el, – dedi Qasym-Jomart Toqaev.
Prezıdent Qyrǵyzstanda bolyp jatqan oqıǵalardy Qazaqstannyń muqııat baqylap otyrǵanyn, ony qyrǵyz eliniń ishki máselesi dep qaraıtynyn atap ótti.
– Baýyrlas qyrǵyz eliniń bolashaǵyna alańdaımyz. Sondyqtan Qyrǵyzstanǵa kómek kórsetý úshin barlyq múmkindikterdi qarastyramyz. Buǵan deıingi kelisimder negizinde eki el arasyndaǵy qarym-qatynastardy damytýdy jalǵastyra beremiz, – dedi Memleket basshysy.
Rýslan Qazaqbaev óz kezeginde Qasym-Jomart Toqaevqa qabyldaǵany jáne Qyrǵyzstandaǵy kúrdeli kezeńde qoldaý bildirgeni, koronavırýs pandemııasy kezinde gýmanıtarlyq kómek kórsetkeni úshin alǵys aıtty.
– Meniń saparymnyń basty maqsaty – elimizde bolyp jatqan ishki saıası ózgeristerge qaramastan baýyrlas qazaq eline qatysty syrtqy saıası baǵdarymyzdyń ózgermeıtinin aıqyndaý. Qyrǵyz Respýblıkasy baýyrlas qazaq elimen aradaǵy jaqsy qarym-qatynastardy qashan da qurmet tutady jáne solaı qala beredi. Elimizdiń jańa basshylyǵy baýyrlas eki eldiń túpki múddelerine saı keletin barlyq baǵyttar boıynsha qyrǵyz-qazaq qatynastaryn odan ári nyǵaıtyp, arttyrýǵa nıetti, – dedi Qyrǵystannyń Syrtqy ister mınıstri.
Prezıdent mınıstrmen kezdesý barysynda saıası, saýda-ekonomıkalyq, ınvestısııalyq, kólik-tranzıttik jáne sý-energetıka salalaryndaǵy yntymaqtastyqty nyǵaıtý máselelerine erekshe kóńil bóldi.