Ábý Nasyr ál-Farabıdiń 1150 jyldyǵyna oraı RMK "Ǵylym ordasy" Sırek kezdesetin kitaptar mýzeıi jáne QMQK "Almaty qalasynyń mýzeıler birlestigi" Almaty mýzeıimen birlese uıymdastyrǵan "Ál-Farabı – rýhanııat shyńy" taqyrybynda dóńgelek ústel jáne "Ǵasyrlardyń ǵulamasy" ekspozısııalyq kórmesin ótkizdi, dep habarlaıdy Egemen.kz.
Ál-Farabıdiń shyǵarmashylyq murasy orasan zor. Ǵalymnyń eńbekteri ortaǵasyrlyq bilimniń barlyq salalaryn qamtıdy. Ál-Farabı Arıstotel, Platon jáne basqa da ejelgi oıshyldardyń shyǵarmalaryna kóptegen túsindirmelerdiń avtory retinde tanymal boldy. "Álemniń ekinshi ustazy" atanǵan uly oıshyl eńbekteriniń kópshiligi taqyryp jaǵynan da, mazmuny jaǵynan da ár alýan. "Arıstoteldiń "Etıka" kitabyna kirispe", "Ǵylymdar klassıfıkasııasy", "Aqyl kitaby", "Baqytty tabý" jáne "Baqytqa jetý joldaryn kórsetý", "Izgi qala turǵyndarynyń kózqarastary" taǵy basqa eńbekteri sonyń kýásindeı. Ál-Farabı fılosofııasy adamnyń izgiligi men parasatyna degen sheksiz senimmen sýsyndaǵan. Sondyqtan óz dáýirindegi barlyq danalyqty boıyna sińirgen ál-Farabıdiń murasy ǵylym men mádenıet tarıhynda zor mańyzǵa ıe.
Dóńgelek ústeldi fılologııa ǵylymdarynyń kandıdaty Á.Qaıyrbekov júrgizip, Almaty qalasy mýzeıler birlestiginiń dırektory Á.Úmbetalıev, QazUÝ ál-Farabı ortalyǵynyń dırektory, fılologııa ǵylymdarynyń kandıdaty B.Meıirbaev, QazUÝ fılologııa ǵylymdarynyń doktory, professor J.Atabaev, "Ǵylym ordasy" RMK Bas dırektorynyń mindetin atqarýshy, tarıh ǵylymdarynyń kandıdaty N.Seıdin sóz sóılep, "Ǵasyrlardyń ǵulamasy" ekspozısııalyq kórmesi jádigerlerimen Sırek kezdesetin kitaptar mýzeıiniń qyzmetkeri, ál-Farabı atyndaǵy QazUÝ PhD doktoranty О́.Tuıaqbaev tanystyrdy.