Tań aǵaryp atqannan kesh qaraıyp batqanǵa deıin bir júrgen jolyn on qaıyra júretin qoǵamdyq kólik júrgizýshileriniń qyzmeti áste ońaı emes. Avtokólik keptelisi de júıkeni juqartady. Kirip-shyqqan jolaýshylardy qadaǵalaý jumysy taǵy bar. Solaı boldy eken dep, jolaýshylar kóliginiń júrgizýshileri ákimshilik quqyqbuzýshylyqtar úshin jaýapkershilikten bosatylmaıdy. Ondaı quqyqbuzýshylyqtardyń aldyn alýdyń kórinisi retinde quqyq qorǵaý organdary el aýmaǵynda ótkizgen aýqymdy «Avtobýs» jedel aldyn alý is-sharasyn aıtýǵa bolady.
Osy sharanyń aıasynda avtoparkterdiń 126 qyzmetkeri jolaýshylar tasymaly salasyndaǵy buzýshylyqtar úshin jaýapkershilikke tartylyp úlgeripti. Turaqty túrde ótkizilip turatyn is-shara eń aldymen jolaýshylar kóliginiń qatysýymen bolatyn apattar sanyn azaıtýǵa, sondaı-aq avtobýs júrgizýshileriniń jol qozǵalysy erejelerin saqtaýyn baqylaýdy kúsheıtýge baǵyttalǵan. Jedel aldyn alý is-sharasyna polısııa qyzmetkerlerimen birge kóliktik baqylaý, tótenshe jaǵdaı organdarynyń qyzmetkerleri jáne qoǵam ókilderi qatysty.
Úsh kúndik reıd barysynda avtobýs júrgizýshileri jasaǵan jol qozǵalysy erejelerin buzýdyń 10 myńǵa jýyq jaǵdaıy anyqtaldy. Olardyń eń kóbi Túrkistan (1063), Qaraǵandy (794), Almaty (775), Pavlodar (715), Shyǵys Qazaqstan (708) jáne Mańǵystaý (704) oblystarynda, sondaı-aq Almaty (744) jáne Nur-Sultan (702) qalalarynda tirkelipti.
Sondaı-aq polıseıler mas kúıinde jolaýshylar kóligin basqarýdyń 15 faktisiniń jolyn kesti. Ondaı júrgizýshiler kólik júrgizý quqyǵynan aıyrylatyn bolady.
Budan basqa, eńbek jáne demalys rejimin buzýdyń 43 faktisi, saqtandyrý zańnamasyn buza otyryp kólikti basqarýdyń 264 faktisi, tehnıkalyq baıqaýdan ótpegen jáne zańsyz qaıta jabdyqtalǵan 1 myńnan astam avtobýs, jyldamdyqty arttyrýdyń 300-ge jýyq faktisi anyqtaldy. Jolaýshylardy tasymaldaý kezinde 1700-den astam avtobýs júrgizýshisi telefondy paıdalanǵan, sondaı-aq 114-i jolaýshylardy zańsyz tasymaldaǵan.
Zań buzýshylyqtary bar avtobýstardy jolǵa shyǵarǵany úshin avtobýs parkteri basshylarynyń qatarynan 126 laýazymdy tulǵa ákimshilik jaýapkershilikke tartyldy, al jekelegen jaǵdaılarda jolaýshylardy tasymaldaýǵa arnalǵan sharttardy buza otyryp, lısenzııalardyń qoldanylýy toqtatyldy. 377 zańsyz qaıta jabdyqtalǵan avtobýs, sondaı-aq paıdalanýǵa tyıym salynǵan tehnıkalyq jaı-kúıi qaýipsizdik talaptaryna sáıkes kelmeıtin kólik quraldary anyqtaldy. 292 kólik quraly aıyp turaǵyna qoıyldy. Jedel aldyn alý is-sharasy barysynda polısııa jáne Tótenshe jaǵdaı mınıstrliginiń qyzmetkerleri avtobýstardyń aldaǵy qys kezinde paıdalanýǵa sáıkestigin (jylytýdyń, qozǵaltqyshty maılaý júıeleri, órt sóndirý quraldarynyń bolýyn) tekserdi. Jalpy, ótken toǵyz aıdaǵy derekter boıynsha, avtobýs júrgizýshileriniń kinásinen bolǵan jol-kólik oqıǵalarynyń sany 352-den 215-ke deıin (39%) tómendegen.
Ákimshilik polısııa komıtetindegi tártip saqshylarynyń aıtýynsha, avtobýs júrgizýshileri men avtopark basshylary jol qozǵalysy jáne jolaýshylardy tasymaldaý erejelerin árdaıym este saqtaýy jáne buzbaýy tıis. Olar óz jolaýshylary men jol qozǵalysyna qatysýshylardyń ómirine jaýap beredi. Sondyqtan avtobýsqa otyrǵan kezde adamdar ózderin tolyq qaýipsiz sezinýi tıis.