Qurlyqtyń hokkeı lıgasynda (QHL) baq synaıtyn Nur-Sultannyń «Barys» klýby tórt jeńilisten keıingi besinshi oıynynda jeńiske jetti. Elordadaǵy «Barys Arenada» ótken kezdesýde jerlesterimiz Qytaıdyń «Kýnlýn» komandasynan basym tústi.
Turaqty birinshiliktiń keıingi bes oıynynyń tórteýinde jeńiske jetken «Kýnlýn» elordaǵa jaqsy kóńil kúımen keldi. Alaıda tórt oıyn qatarynan jeńilip, jeńiske sýsap qalǵan «Barys» bul oıynda baryn saldy. Jerlesterimiz alǵashqy kezeńdi sátti bastady. Birinshi 20 mınýttyń orta tusynda «Barystyń» shvesııalyq shabýylshysy Iаkob Lılıa áriptesiniń tamasha pasynan keıin qarsylastyń qaqpasyn dál kózdedi.
Kezeń sońyna deıin san basymdyǵyna ıe bolǵan «Barys» hokkeıshileri utymdy sátti tıimdi paıdalanyp qalýǵa tyrysty. Nátıjesinde, kezdesýdiń 14-mınýtynda bıylǵy maýsymda elorda komandasyna qaıta oralǵan Mett Frettın mergendigimen kózge tústi. Bul – kanadalyq shabýylshynyń osy maýsymdaǵy alǵashqy goly.
Ekinshi kezeńniń basynda qonaqtar tizgindi óz qoldaryna aldy. 24-mınýtta Nıkolıshınniń dál soqqysy qaqpadan tabylyp, esep aıyrmasyn qysqartty. Al úshinshi kezeńde tablodaǵy kórsetkish ózgerissiz qaldy. Bul jeńisinen keıin jerlesterimiz 18 upaımen 10-orynǵa turaqtady. «Barys» kelesi oıynyn erteń Rıganyń «Dınamosymen» ótkizedi.