Soltústik polıseıleri «Hi-Tech» respýblıkalyq jedel-profılaktıkalyq is-sharasy aıasynda bir qylmysty izin sýytpaı ashty. Petropavldyq bir áıel polısııaǵa iri bankterdiń biri ózine resimdemegen nesıe boıynsha 100 myń teńge kólemindegi tólemdi talap etip jatqany týraly aryzben shyqqan. Krımınaldyq polısııa qyzmetkerleri áıeldiń qujattary men bank kartasyn paıdalaný múmkindigi bar onyń 22 jastaǵy ulyn ustady. Balasy anasyn aldap, onyń 100 myń teńge aqshasyn jymqyrmaq bolǵan...
«Hi-Tech» respýblıkalyq jedel-profılaktıkalyq is-sharasynyń maqsaty – ınternet arqyly jasalatyn qylmystarmen kúresý. Sonyń nátıjesinde kıberqylmystardy ashý jónindegi mamandandyrylǵan jedel-tergeý tobynyń jumysy kúsheıtildi. Osynyń nátıjesinde buryn jasalǵan alty ınternet-alaıaqtyq ashyldy. Úsh kúdiktini ustaý úshin krımınaldyq polısııa qyzmetkerleri Nur-Sultan, Ekibastuz jáne Pavlodar qalalaryna bardy. Belgili bir qarajat somasyna qajetti qujattardy jyldam alýǵa kómektesetini týraly habarlandyrý ornalastyrǵan elorda turǵyny ustaldy. Máseleni ońaı jolmen sheshpekshi bolǵan ol petropavldyq jigitten 77 myń teńgeni qaqshyp ketken. Ashyqaýyz petropavldyq máselesin sheshemin degen alaıaqqa 77 myń teńgeni aýdara salǵan. Aqshany qolyna túsirgen soń «qyzmet kórsetýshi» zym-zııa bolyp, tutqany kótermeı qoıǵan. «Sońǵy kezde vırtýaldy alaıaqtar túrli ádisterdi paıdalanady. Olardyń maqsaty – adamdardyń jeke málimetteri men bank derektemelerine qol jetkizý. Qolǵa túsken aqparat arqyly qaskóıler jábirlenýshilerdiń atyna nesıe resimdeıdi. Sondaı-aq túrli «qyzmetter» usynyp, jábirlenýshiniń aqshasyn aldap alyp ketedi. Jedel-profılaktıkalyq is-sharanyń alǵashqy kúninde jumysqa ornalasýǵa kómek kórsetemin dep alaıaqtar medısınalyq anyqtamany jyldam resimdeýge aqsha suraǵan, sonymen birge bank kartasynyń derektemelerin aldap qolǵa túsirgen. Osyndaı úsh fakti anyqtaldy», - dep atap ótti oblystyq Polısııa departamenti Krımınaldyq polısııa basqarmasynyń bastyǵy, polısııa polkovnıgi Petr Klımov.
Sonymen birge jedel-profılaktıkalyq is-sharanyń alǵashqy kúninde oblys polıseıleri taýarlardy satý týraly 2 jalǵan habarlandyrýdy anyqtady. Quqyqqa qaıshy kontentpen 30-dan astam resýrs anyqtalyp, siltemeleri quzyretti organdarǵa buǵattaý úshin jiberildi. Áleýmettik jelilerde tártip saqshylary ınternette kúmándi kelisim jasaýdan aýlaq bolý, jeke jáne qarjy málimetterin, qupııasózderdi eshkimge bermeý, aqshany jiberýge qatysty kez-kelgen málimetti egjeı-tegjeıli tekserý sııaqty keńesteri bar jadynamalardy ornalastyrdy.
Soltústik Qazaqstan oblysy