Aýstrııa astanasy Venada terakt bolyp, birneshe adam qaza tapty. Polısııa lańkesterdi izdeý jumystaryn jalǵastyryp jatyr. Ázirge sodyrlardyń bireýi oqqa ushqany anyqtaldy.
Oqıǵanyń izinshe Vena polısııasynyń Twitter-akkaýntynda arnaıy operasııanyń júrgizilip jatqany týraly habarlandy. Qala bıliginiń habarlaýynsha, qanquıly shabýyldy birneshe qaskóı uıymdastyrǵan.
Polısııanyń málimetine saı, shabýyl alty jerde, sonyń ishinde qala ortalyǵyndaǵy sınagogada, evreı ortalyǵy men meıramhana janynda bolǵan. Quqyq qorǵaý organdary bir adamnyń qaıtys bolǵanyn, birneshe adamnyń aýyr jaraqat alǵanyn, onyń ishinde polısııa qyzmetkeri bar ekenin rastady. Budan bólek, 15 adam jaraqat alǵan.
Zardap shekkenderdiń jaǵdaıy aýyr bolǵandyqtan, qaza tapqandar týraly málimet ázirge naqty emes. Keı buqaralyq aqparat quraldary 7 adam kóz jumdy dese, polısııa qazirge 4 adamnyń baqıǵa attanǵanyn rastady.
Bılik qala turǵyndarynan úıden shyqpaýdy, terezege jaqyndamaýdy suraıdy jáne kýágerlerge oqıǵa ornynan vıdeo men sýretti áleýmettik jelige taratpaýǵa shaqyrdy. Qalada qoǵamdyq kólik toqtatyldy.
Reıter agenttiginiń habarlaýynsha, Aýstrııa Ishki ister mınıstri Karl Nehammer oqıǵany terrorıstik shabýyl dep ataǵan. Mınıstr taǵy da shabýyldyń bolýy múmkin ekenin eskertti. О́ıtkeni sodyrlardyń keıbiri áli qolǵa túspegen.
Aýstrııa kansleri Sebastıan Kýrs polısııa shabýyl jasaýshylarǵa qarsy batyl áreket etetinin aıtty. «Biz terrorızm arqyly qorqytyp-úrkitýge jol bermeımiz jáne mundaı shabýyldarǵa qarsy bar kúsh-jigerimizben kúresemiz», delingen kanslerdiń málimdemesinde.
Áleýmettik jelilerde Venadaǵy shabýyldyń sáti degen vıdeo tarady. Onda er adam kóshedegi turǵyndarǵa myltyqtan oq jaýdyrady. Áıtse de, eldegi quqyq qorǵaý qyzmeti vıdeo derekterdi tekserip jatqandyqtan, onyń anyq-qanyǵy týraly málimet bergen joq.
Oqıǵaǵa baılanysty Qazaqstan Syrtqy ister mınıstrligi aqparat berip, jaralanǵandar men qaza tapqandar ishinde Qazaqstan azamaty joq ekenin málimdedi.
«Aýstrııalyq polısııa terrorızmge qarsy aýqymdy operasııa júrgizip jatyr. Qazaqstannyń Aýstrııadaǵy elshiliginiń aldyn ala aqparatyna sáıkes, qaza tapqandar men jaralanǵandar arasynda Qazaqstan azamattary joq», delingen habarlamada.