Bir kezderi batyr babalarymyz naızanyń ushymen, bilektiń kúshimen saqtap qalǵan Uly dalanyń búgingi qalqany – aıbyndy áskerimiz der edik. Al ásker sarbazsyz bolsyn ba? Onyń da qataryn udaıy tolyqtyryp turý qajet. Bul rette, áskerı komıssarıattardyń jańa kelbetin qalyptastyrý máselesi de ózektiligin joımaıtyny belgili. Elimizdiń qorǵanys salasy bul baǵytta da aýqymdy jumystar atqaryp jatyr.
Iá, Qazaqstan dep júregi soqqan árbir qaısar ulannyń basty paryzy – Otan qorǵaý. Alaıda «erim deıtin el bolmasa, elim deıtin er qaıdan bolsyn» demekshi, sarbazdyń qamyn oılamaıynsha tasymyz órge domalap ketpeıtini anyq. Osyny eskergen Qorǵanys mınıstrligi áskerı komıssarıattardyń jańa kelbetin qalyptastyrýdy qolǵa aldy.
Máselen, 2019 jyly Qorǵanys vedomstvosynda qabyldanǵan josparǵa sáıkes, osy jyldyń basynan beri jergilikti áskerı basqarý organdaryn (áskerı komıssarıattardy) qaıta uıymdastyrý boıynsha jumystar júrgizilip jatyr. Sebebi, qorǵanys isteri jónindegi departamentter, basqarmalar men bólimder Qarýly Kúshter men qoǵamdy baılanystyratyn negizgi býyn bolyp sanalady. Sol sebepti Qorǵanys mınıstrligimen olarǵa jańa, zamanaýı kelbet berý boıynsha birqatar sharalar uıymdastyrylyp otyr. Oryn alyp jatqan ózgerister osy baǵyttaǵy qyzmettiń barlyq salasyna qatysty.
Árıne, qorǵanys salasy úshin eń aldymen áskerı komıssarıattardyń halyqqa qoljetimdiligi men yńǵaılylyǵy, olardyń syrtqy kelbeti, ınfraqurylymy mańyzdy. Osy maqsatta ǵımarattardy jóndeý, qajetti qyzmettik jáne turmystyq úı-jaılardy qurý, jabdyqtaý, sonyń ishinde halyqty qabyldaý jáne áskerge shaqyrylýshylardy ornalastyrý, avtomobıl tehnıkasyna arnalǵan turaqtar boıynsha jumystar júrgizilmek.
Halyqpen jumys isteýge erekshe kóńil bólinedi. Árbir azamat áskerı komıssarıatqa kelip, áskerı esepke alýǵa jáne áskerı qyzmetke shaqyrýǵa qatysty anyqtamalyq materıaldarmen tanysa alady. Mekemege kelýshilermen tikeleı jumys isteý úshin azamattardy qyzyqtyratyn barlyq suraqtarǵa jaýap bere alatyn jáne qajet bolǵan jaǵdaıda máselelerin sheshýge kómek kórsetetin arnaıy qyzmetkerler oqytylady.
Jergilikti áskerı basqarý organdarynyń jumysyn jetildirýde sıfrlandyrýdyń da mańyzy zor. Osyǵan deıin áskerı komıssarıatqa arnaıy kelip alý kerek bolǵan 9 qyzmet túrin búginde «Elektrondyq úkimet» portalynan alýǵa bolady. Atap aıtqanda esepke qoıý jáne esepten shyǵarýdyń, áskerı-tehnıkalyq mektepterge túsýdiń, tirkeý kýáligi men áskerı bılettiń, sondaı-aq túrli aqparattyq anyqtamalardy alýdyń joly jeńildedi.
Áskerı komıssarıattardy basqa memlekettik organdardyń derekter bazasymen ıntegrasııalaý júrgizilýde. Bul qadam áskerı esepke alýdy elektrondy formatta júrgizýge, al áskerı mindettilerdi esepke qoıý men shyǵarýdy olardyń turǵylyqty mekenjaıy boıynsha avtomatty túrde júrgizýge múmkindik beredi.
Qorǵanys vedomstvosynyń jospary boıynsha osy is-sharalardy jappaı iske asyrý azamattardyń áskerı qyzmetke túsýin yńǵaılatyp, armııa men qoǵam arasynda syndarly dıalog qalyptasatyn bolady. Sonymen qatar bul qadamdar sybaılas jemqorlyq táýekelderin azaıtýǵa jáne qaǵazbastylyqty qysqartýǵa yqpal etedi.
Nur-Sultan qalasynyń qorǵanys isteri jónindegi departamenti men elordanyń aýdandyq áskerı komıssarıattary bazasynda «Sıfrlyq jergilikti áskerı basqarý organy» qanatqaqty jobasy iske qosyldy. Al jaqyn arada barlyq jergilikti áskerı basqarý organdaryn osy zamanǵy biryńǵaı standartqa keltirý josparlanyp otyr.
Budan basqa, qorǵanys isteri jónindegi bólimshelerde sybaılas jemqorlyq táýekelderin taldaý jáne azaıtý jónindegi qyzmet uıymdastyryldy. Bul jumysqa osy jyldyń aqpan aıynda qol qoıylǵan ózara is-qımyl týraly memorandým negizinde Sybaılas jemqorlyqqa qarsy is-qımyl agenttigi de qosyldy.