Májilistiń depýtattary zeınetaqy jınaqtarynyń bir bóligin qajettilikterge maqsatty paıdalanýdy qarastyratyn "Qazaqstan Respýblıkasynyń keıbir zańnamalyq aktilerine ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly" zań jobasyn birinshi oqylymda maquldady, - dep habarlaıdy Egemen.kz
Zań jobasyna sáıkes 2021 jyldan bastap qazaqstandyqtarǵa zeınetaqy jınaqtarynyń bir bóligin turǵyn úı jaǵdaılaryn jaqsartýǵa, qymbat turatyn emdelýdiń aqysyn tóleýge nemese jeke basqarýshy kompanııalarǵa basqarýǵa berý quqyǵy beriletin bolady.
Zeınetaqy jınaqtarynyń bir bóligin naqty qajettilikterge paıdalaný quqyǵy:
- jumys isteıtin, tıisti jasta zeınetaqy jınaqtary "jetkiliktilik sheginen" asatyn azamattarǵa (bolashaq jumys kezeńi men júıeli túrde zeınetaqy jarnalaryn tóleýdi eskere otyryp, zeınetkerlik jasqa jetkennen keıin eń tómengi zeınetaqydan az bolmaıtyn zeınetaqy tólemderin qamtamasyz etýge jetkilikti zeınetaqy jınaqtarynyń somasy);
- saqtandyrý kompanııalarymen eń tómengi zeınetaqydan az bolmaıtyn mólsherde ómir boıǵy annýıtettik tólemdi qamtamasyz etetin zeınetaqy annýıteti shartyna otyrǵan adamdarǵa – BJZQ-da qalǵan zeınetaqy jınaqtarynyń somasy sheginde (shamamen);
- zeınetkerlikke shyqqan azamattarǵa (onyń ishinde áleýetti qurylymdar qatarynan) - BJZQ-da qalǵan zeınetaqy qarajatynyń 50%-ynan aspaıtyn shekte. Eger olardyń zeınetaqysynyń jıyntyq mólsheri (jasyna nemese eńbek ótiline baılanysty zeınetaqyny, bazalyq zeınetaqyny jáne zeınetaqy jınaǵynan tólemderdi qosa alǵanda) joǵalǵan tabysty halyqaralyq standarttarǵa sáıkes keletin deńgeıde (keminde 40%-ǵa) almastyrýdy qamtamasyz etken jaǵdaıda.
"Jetkiliktilik shegi" retinde belgili bir jastaǵy salymshy úshin onyń tabysynan BJZQ-ǵa aldaǵy 10% turaqty zeınetaqy jarnalaryn (eń tómengi jalaqydan az emes) eskere otyryp, eń tómengi zeınetaqy mólsherinen az bolmaıtyn zeınetaqy tólemderimen qamtamasyz etýge múmkindik beretin zeınetaqy jınaqtarynyń eń tómengi qajetti somasy qarastyrylady.
"Jetkiliktilik shegi" áıelder men erler úshin birdeı belgilenedi jáne árbir jas úshin esepteledi. Bul rette ol qalyptasqan parametrlerge (kiristilik, ınflıasııa, eń tómengi tólem mólsheri jáne t. b.) súıene otyryp, jańa alýshylar úshin qaıta esepteletin bolady.
Zań jobasynda sondaı-aq joǵaryda atalǵan sanattaǵy azamattar zeınetaqy jınaqtarynyń bir bóligin ózderi, jubaılary nemese jaqyn týystary (atalary/ájeleri, ata-analary, balalary, nemereleri, aǵa-inileri/apa-sińlileri) úshin turǵyn úı jaǵdaılaryn jaqsartý maqsatynda nemese emdelýge aqy tóleýge paıdalana alady dep kózdelgen. Maqsatty paıdalaný úshin kórsetilgen otbasy músheleriniń qarajatyn biriktirýge bolady.
Belgilengen talaptarǵa sáıkes kelgen jaǵdaıda alyp qoıý sany boıynsha shekteýler kózdelmegen, ıaǵnı azamattar zeınetaqy jınaqtarynyń bir bóligin bir nemese basqa maqsatqa qaıta paıdalana alady.
Zeınetaqy jınaqtaryn tóleý esebinen turǵyn úı jaǵdaılaryn jaqsartý tártibin QR Indýstrııa jáne ınfraqurylymdyq damý mınıstrligi bekitedi.
Zeınetaqy jınaqtaryn tóleý esebinen medısınalyq kómek alýǵa azamattardy jiberý qaǵıdalaryn QR Densaýlyq saqtaý mınıstrligi aıqyndaıtyn bolady.
Zeınetaqy aktıvterin senimgerlik basqarýǵa berý qaǵıdalaryn QR Qarjy naryǵyn retteý jáne damytý agenttigi aıqyndaıdy.