SQO Taıynsha aýdany polısııa bóliminiń kezekshi qyzmetine Kırov aýylynyń sanıtarlyq beketinde Mercedes avtomashınasy toqtatylǵanda onda ósimdik tektes keptirilgen zat salynǵan paket bary anyqtalǵany jetkizilgen.
Munyń esirtkilik zat ekenin sezgen bekettegi qyzmetkerler polısııa bólimine habarlaǵan eken. Kólik júrgizýshi Kırov aýylynyń 50 jastaǵy turǵyny paketke salynǵan jabaıy qarasorany tasymaldaǵan, dep habarlaıdy Egemen.kz.
Sot-hımııalyq saraptamanyń nátıjesine qaraǵanda pakettegi zat - salmaǵy 680 gramm bolatyn keptirilgen marıhýana bolyp shyqty.
Taıynsha aýdany polısııa bóliminiń bastyǵy, polısııa podpolkovnıgi Nurlyjan Aqtanovtyń aıtýyna qaraǵanda osy fakti boıynsha Qylmystyq kodekstiń 296-babynyń 2-bóligimen qylmystyq is qozǵalǵan. Ustalǵan adamǵa qatysty mindetti kelý túrindegi bultartpaý sharasy tańdaldy.
Soltústik Qazaqstan oblysynyń Polısııa departamenti Esirtki qylmysyna qarsy is-qımyl basqarmasynyń málimetinshe, jyl basynan beri oblys polıseıleri zańsyz aınalymnan 398 keliden astam túrli esirtki zattaryn, onyń ishinde 349 keli marıhýana tárkilegen.