Qurlyqtyq hokkeı lıgasynda (QHL) baq synaıtyn elordanyń «Barys» klýby turaqty birinshiliktiń kezekti týr oıynynda Cherepoves qalasyna qonaqqa baryp, jergilikti «Severstal» hokkeıshilerinen basym tústi.
«Barystyń» bas bapker Iýrıı Mıhaılıs áli kúnge deıin komandanyń negizgi quramyn anyqtaı almaı kele jatqany barshaǵa belgili. Ár oıyn saıyn túrli hokkeıshilerdi synap kórip jatqan Mıhaılıs keshegi kezdesýde jýyrda ǵana klýbqa qosylǵan qorǵaýshy Dıllon Heterıngton men shabýylshy Fıl Varondy birinshi mınýttan bastap muzaıdynǵa shyǵardy. Nátıjesinde, «Barystyń» soqqan úsh golynyń ekeýine joǵaryda ataǵan eki oıynshy assıstenttik jasady.
Kezdesýdiń birinshi bóliginde qazaqstandyq komanda sapynan Darren Dıs (8-mınýt) pen Lınýs Vıdell (10-mınýt) mergendigimen kózge túsip, esepti 2:0-ge jetkizdi. Dıske Dıllon Heterıngton nátıjeli pas asyrsa, Vıdelldiń gol soǵýyna Fıl Varon múmkindik jasady. Ekinshi kezeńdi sátti bastaǵan aıdyn ıeleri 29-mınýtta esep aıyrmasyn qysqartýǵa múmkindik aldy. Gol avtory – Vladıslav Provolnev. Alaıda úshinshi kezeńniń 47-mınýtynda komanda kapıtany Darren Dıs dýbl avtory atanyp, «Barysqa» jeńis syılady. Qorytyndy esep – 3:1.
Bul jeńisinen keıin jerlesterimiz 22 upaımen 7-orynǵa kóterildi. «Barys» kelesi kezdesýin búgin Iаroslavldiń «Lokomotıv» klýbymen ótkizedi.