Qazaqstandyq kásipqoı boksshy Tursynbaı Qulahmet kúni keshe Anglııada ótken boks keshinde óner kórsetip, nebári ekinshi kezdesýinde-aq birinshi orta salmaqtaǵy WBC International belbeýin ıelendi.
Ĭorkshır qalasynda uıymdastyrylǵan aıqastyń basty jekpe-jeginde rıngke kóterilgen otandasymyz aǵylshyndyq óte tájirıbeli boksshy Makleı Makgoýenmen kúsh synasty. Kásipqoı bokstaǵy tusaýkeser kezdesýin 2014 jyly ótkizgen 25 jastaǵy bylǵary qolǵap sheberi búginge deıin sharshy alańǵa 15 márte shyǵyp, onyń birde-bireýinde qarsylasyna ese jibermegen. Tek bir kezdesýinde ǵana teń túsken.
О́ziniń ekinshi kezdesýinde osyndaı qarymdy boksshyǵa tap bolǵan Tursynbaı Qulahmet qarsylasynan esh qaımyqqan joq. Salmaq ólsheý sátinde brıtanııalyq boksshy ózderine tán ádetpen jerlesimizdi sózben túırep alsa da, Tursynbaı qazaqy baısaldylyqpen onyń aıtqandaryna mıyǵynan bir kúlip, «áýseleńdi rıngte kórermiz» degen ıshara bildirdi.
Jekpe-jek bastala sala ańdysyp otyrýdyń qajeti joq dep sanaǵan qandasymyz birden rıngtiń ortasyn ıelenip, qarsylasyn soqqynyń astyna ala bastady. Raýnd saıyn jyldamdyǵyn arttyrǵan jerlesimiz jetinshi raýndtyń sońǵy sekýndtarynda oń qolymen qarsylasynyń qulaq shekesinen uryp, Makgoýendi eseńgiretip tastady. Nokdaýn! Tóreshi tez arada esep ashyp, brıtanııalyqtyń ózine kelýi úshin sanaı bastady. Referıdiń sanaǵy bitemin degenshe, raýndtyń aıaqtalǵanyn bildiretin gong úni estildi. Sóıtip Makleıge es jınap alý úshin taǵy bir mınýt ýaqyt berildi.
Segizinshi raýndta jekpe-jekti merziminen buryn aıaqtaýǵa umtylǵan Qulahmet kezekti úsh mınýttyń ortasynda qarsylasyn ıterip jibergeni úshin tóreshi jerlesimizge eskertý jasap, úsh upaıyn alyp qoıdy. Qalǵan eki raýndta da bir demmen judyryqtasyp shyqqan qazaqstandyq boksshy jekpe-jek qorytyndysy boıynsha tóreshilerdiń biraýyz sheshimimen jeńiske jetti. Úsh tóreshi de 99-89, 99-89, 99-89 esebin tirkedi.
Osylaısha jerlesimiz óziniń ekinshi aıqasynda jeńiske jetip qana qoımaı, WBC International belbeýin ıelendi. Sóıtip ol qazaqstandyq kásipqoı boksshylardyń arasynda beldikke eń jyldam qol jetkizgen birinshi boksshy atandy. Tipti Gennadıı Golovkınniń ózi kásibı sharshy alańdaǵy alǵashqy beldigin 2009 jyly 17-shi kezdesýinde beline taqqan bolatyn.
Keshegi jeńisinen keıin otandasymyz óz salmaǵynda 2025 boksshynyń arasynda álemdik reıtıngte 102-orynǵa kóterildi. Aıta keteıik, áýesqoı boksta Azııa chempıony jáne álem birinshiliginiń qola júldegeri atanǵan Tursynbaı Qulahmet kásipqoı bokstaǵy alǵashqy jekpe-jegin osy jyldyń 23 tamyzynda Saǵadat Rahmanqulmen ótkizip, tehnıkalyq nokaýtpen jeńiske jetken edi.