Abaı atyndaǵy Qazaq ulttyq pedagogıkalyq ýnıversıtetinde S.Asfendııarov atyndaǵy Qazaq ulttyq medısına ýnıversıteti jáne Q.Sultanqojauly atyndaǵy Qazaq Proskopııa akademııasynyń atsalysýymen Qurtqa táýip Sultanqojaulynyń 250 jyldyǵyna arnalǵan ǵylymı-tájirıbelik konferensııa ótti.
Úsh ǵasyrdyń kýágeri, 136 jyl ǵumyr keshken Qurtqa Sultanqojauly – táýip-emshi, synyqshy ǵana emes, halyqtyń birligin oılaǵan qaıratker tulǵa. El arasyn bitistirip, jaýgershilik zamandarda shashyrap ketken aǵaıynnyń basyn qosýdaǵy qaıratkerlik eńbegi óz aldyna bir tóbe. Sondyqtan da el arasyna «El ıesi – Qurtqa» dep tanylǵan.
Alqaly jıynda sóz alǵan rektor Takır Balyqbaev «Abaı atyndaǵy Qazaq ulttyq pedagogıkalyq ýnıversıteti elimizdegi muǵalim kadrlaryn daıarlaıtyn bas oqý orny bolǵandyqtan, bolashaq mamandardy tulǵalyq qasıetterge tárbıeleý men onyń ádis-tásilderin aıqyndaý jaýapkershiligi osy oqý ornyna zor mindetter júktep otyrǵany belgili», dep atap ótti. Osy baǵytta ýnıversıtette ashylǵan «Uly dala tulǵalary» ortalyǵynyń jumysyna toqtalyp ótken T.Balyqbaevtyń aıtýynsha, elimizdiń damý, kemeldený tarıhynda óz orny bar kórnekti memleket jáne qoǵam qaıratkerleri, ult batyrlary, aqyndar men bı-sheshenderdiń ómir joly men ultqa sińirgen eńbegin, tarıhı muralaryn zerttep, dáripteýdi maqsat etip keledi. Ortalyqta árbir oqý jyly saıyn kem degende 20-dan astam tanymdyq dáris ótkiziledi.
Ǵylymı-tájirıbelik konferensııada fılologııa ǵylymdarynyń doktory, professor Temirhan Tebegenov, S.Asfendııarov atyndaǵy Qazaq ulttyq medısına ýnıversıtetiniń rektory Talǵat Nurǵojın Qurtqa Sultanqojaulynyń medısına salasyndaǵy eńbekterine toqtalsa, tarıh ǵylymdarynyń doktory, akademık Mámbet Qoıgeldi Qurtqa táýip tálim alǵan Ábý Álı ıbn Sına eńbekteriniń tarıhı róline erekshe mán berdi. Professor Jolmuhan Túrikpenuly, Qazaqstan emshiler qaýymdastyǵynyń ókili Nurgúl О́tebaeva jáne basqa da ǵalymdar tarıhı tulǵanyń qyzmetine toqtalyp, Qurtqa Sultanqojaulynyń ómiri men emshilik qyzmetin tereńnen ashyp kórsetý maqsatynda Buqaraǵa, Samarqandqa, Egıpetke jáne Peterbýrgke arnaıy ekspedısııalar jiberip, arhıv derekterin zertteý isin jalǵastyrý týraly usynystaryn ortaǵa saldy.
Konferensııa aıasynda Myrzahan Ahmetov jetekshilik etetin Qoǵammen baılanys bólimi Jetisý jáne kórshiles qyrǵyz eline aty málim bolǵan, arab-parsysha hat tanyǵan halyq emshisi Qurtqa Sultanqojauly jaıyndaǵy qosymsha derekterdi usyndy. Sonymen birge belili kınojýrnalıst jáne rejısser Doqtyrhan Turlybektiń «Úsh ǵasyrdyń kýágeri» derekti fılmi kórsetilip, jıynǵa qatysqan ǵalymdar ýnıversıtet baspasynan shyqqan Qurtqa táýip týraly kitappen tanysty.
ALMATY