Qazaqstanda AQSh-tyń halyqaralyq damý agenttiginiń (USAID) uıymdastyrýymen onynshy jyl saıynǵy Ortalyq Azııa saýda forýmy ótip jatyr, dep habarlaıdy Egemen.kz
Bul saýda forýmy Ortalyq Azııada jáne odan tys jerlerde óńirlik saýdany damytý maqsatyndaǵy halyqaralyq is-shara.
Bes kúndik forýmda Aýǵanstan, Ulybrıtanııa, Germanııa, Grýzııa, Qazaqstan, Qyrǵyz Respýblıkasy, Latvııa, Lıtva, Birikken Arab Ámirligi, Reseı, AQSh, Tájikstan, Túrkııa, Túrikmenstan, Ýkraına jáne О́zbekstan elderin qosqanda jalpy 39 elden 100 spıker men 4000 qatysýshy bolady.
Bıylǵy forýmnyń taqyryby «Ortalyq Azııa – damý jáne órkendeý». Bul taqyryp COVID-19-dan keıin ekonomıkanyń qalpyna keltirý kezindegi Ortalyq Azııadaǵy jańa úrdister men naryqtyń reaksııasyn zertteýge arnalǵan. Vırtýaldy is-sharany Zoom, Facebook Live jáne YouTube onlaın platformalarynda baqylaýǵa bolady. Saýda forýmy halyqaralyq jáne aımaqtyq sarapshylarǵa, novatorlar men kásipkerlerge Ortalyq Azııadaǵy saýdany damytý úshin baılanystaryn nyǵaıtýǵa múmkindik beredi.
Qatysýshylar ınteraktıvti onlaın-sessııalarǵa qosylyp, aımaqtyq jetkizilimder tizbegin COVID-19 kezindegi jaǵdaıǵa beıimdeý, Ortalyq Azııadaǵy týrızmdi qalpyna keltirý, aımaqtaǵy elektr energııasynyń naryǵyn damytý, aımaqtyq onlaın-saýda naryǵynyń máseleleri men múmkindikteri, memlekettik-jekemenshik seriktestikter men aımaqtyq áıelder kásipkerlikterin qurý jáne t.b. boıynsha pikirtalastarǵa qatysa alady.
Sonymen qatar, forým barysynda Qazaqstan, Qyrǵyz Respýblıkasy, Tájikstan, Túrikmenstan jáne О́zbekstannan kelgen 20-dan astam jemis-kókónis ónimderin óndirýshiler Saýda álemi (World of Trade) vırtýaldy rıteıl forýmynyń sheńberinde búkil aımaqtan jáne odan tys óńirlerden kelgen seriktestermen onlaın-kelissózder ótkizedi.
«Osydan on jyl buryn saýda yntymaqtastyǵyn keńeıtý arqyly Ortalyq Azııa elderi arasyndaǵy turaqtylyqty, órkendeýdi jáne ózara baılanysty nyǵaıtýǵa bolady degen senimdilikten osy saýda forýmynyń ıdeıasy týyndaǵan edi. Saýda-sattyq árqashan eki tarapqa da paıdasyn tıgizedi. Bizdiń birlesken kúsh-jigerimizdiń arqasynda ár adam adal jáne ashyq saýda yntymaqtastyǵynan paıda kóre alady», – dedi AQSh-tyń Qazaqstandaǵy elshisi Ýılıam H. Mozer.
Vashıngtonnan forýmǵa USAID-tyń Azııa boıynsha bıýrosynyń basshysy kómekshisiniń mindetin atqarýshy Haver Pıedra qosyldy. Ol óz sózinde: «USAID osyndaı mańyzdy is-sharany qoldaıtynyn maqtan tutady jáne biz jańa kommersııalyq baılanystardy damytý jáne Ortalyq Azııa elderi men AQSh arasyndaǵy ekonomıkalyq yntymaqtastyqty nyǵaıtý arqyly aımaqtaǵy, onyń ishinde Aýǵanstandaǵy saýdany arttyrýǵa daıynbyz», – dep atap ótti.
Sońǵy onjyldyqta Ortalyq Azııa saýda forýmy jańa úrdister týraly bilý, ıdeıalarmen almasý, baılanystardy damytý jáne bıznes júrgizý maqsatynda 30-dan astam elden kelgen memlekettik jáne jekemenshik sektorlarynyń 5000-nan astam ókilderin biriktirdi. Sońǵy onjyldyqta Ortalyq Azııa elderi arasyndaǵy taýar aınalymy eki eseden astam ulǵaıyp, jylyna shamamen 6 mıllıard AQSh dollaryn qurady.
Forýmnyń basty uıymdastyrýshysy Amerıka Qurama Shtattary Halyqaralyq damý agenttiginiń (USAID) básekege qabilettilik, saýda jáne jumys oryndaryn qurý jónindegi jobasy bolyp tabylady. Forýmdy qoldaǵan basqa seriktester – Shytyrman oqıǵaly týrızmniń saýda qaýymdastyǵy, О́zbekstandaǵy Amerıkalyq saýda palatasy, CERT akademııasy, Koroldik logıstıka jáne kólik ınstıtýty (CILT), Eýropalyq Qaıta qurý jáne damý banki (EQDB), Sýyq tizbeginiń ǵalamdyq alıansy (GCCA), Indy Guide, «KAZLOGISTICS» Qazaqstannyń kólik qyzmetkerleriniń odaǵy, «Lonely Planet» baspasy, Ekonomıkalyq yntymaqtastyq jáne damý uıymy, BUU Dúnıejúzilik Týrıstik Uıymy, Wideoyster jýrnaly, «Logıstıka men kólik salasyndaǵy áıelder» jobasy jáne World Travel Market kórmesi.