Qalalyq jerlerde jol-kólik oqıǵasynyń saldarynan keptelek týyndaıdy. Patrýldik polısııa kelip, hattama toltyrǵansha, oqıǵa orny qozǵalysqa aıtarlyqtaı kedergi keltiredi. Osy máselege nazar aýdarǵan О́skemendegi joǵary oqý oryndarynyń ǵylymı qyzmetkerleri mán-jaıdy anyqtaýdyń ońtaıly jolyn usynyp otyr.
D.Serikbaev atyndaǵy Shyǵys Qazaqstan tehnıkalyq ýnıversıtetindegi ǵylymı qyzmetkerlerdiń aıtýynsha, jol-kólik oqıǵasy soqtyǵysqandardyń ǵana emes, basqa da kólik júrgizýshileriniń, jolaýshylardyń altyn ýaqyttaryn alyp qoıady. Mamandardyń mólsherleýinshe, polısııa qyzmetkerleri ólshep, hattama toltyrǵansha kem degende bir, bir jarym saǵat ýaqyt ótedi. Al tehnologııanyń damyǵan zamanynda oqıǵa sebebin anyqtaýdyń jedel joldary bar.
– Jol-kólik oqıǵasynda kináli jaqty anyqtaý úshin ár santımetr mańyzdy. Sondyqtan barlyq ólshemder durys bolýy kerek. Biz kopter arqyly áýeden fotoǵa túsirip, oqıǵa kórinisin modeldeýdi usynyp otyrmyz. Sodan keıin derekter negizinde avtotehnıkalyq saraptama júrgizýge bolady. Eń mańyzdysy, bul ádis polıseıler men jolaýshylardyń ýaqytyn únemdeıdi, – dedi «Veritas» ozyq damý ortalyǵynyń bas mamany Andreı Ohotenko.
Áýeden jasalǵan fototúsirilim arqyly qajetti parametrler avtomatty túrde esepteledi eken. Naqtyraq aıtsaq, avtokóliktiń zaqymdanýy anyqtalady, kóliktiń toqtaǵan joly ólshenedi. Qajet bolǵan jaǵdaıda avtokólik pen ushyp ketken synyqtar arasyndaǵy qashyqtyq esepteledi.
«Veritas» ortalyǵy mamanynyń pikirinshe, áýe fototúsirilim rásiminen keıin soǵylyp qalǵan kólikterdi joldan alyp tastaýǵa bolady.
Oblystyq prokýratýra mamandary qatysqan jıynda usynylǵan jobaǵa polısııa departamentiniń qyzmetkerleri qyzyǵýshylyq tanytty. Qosymsha jol-kólik oqıǵasy bolǵan jerlerdi belgileý úshin 3D formatta kompıýterlik modeldeýdi qoldaný kerektigi aıtyldy. Joba qabyldanyp, júzege asyp jatsa, Polısııa departamenti ushqyshsyz ushý apparattarymen, qosymsha baǵdarlamalarmen qamtylýy kerek. Sondaı-aq árbir jol patrýldik polısııasy kopter ushyrýdy meńgerýi tıis.
О́SKEMEN