Búgin oblys ákimi Gúlshara Ábdiqalyqova "Antikor Live" jobasy aıasynda "Ákimdikterdiń ashyqtyǵy, eseptiligi jáne qol jetimdiligi" taqyrybynda tikeleı efırde suhbat berdi, dep habarlaıdy Egemen.kz.
Aımaq basshysyna áleýmettik jelidegi oblys turǵyndarynyń pikirleri negizinde sybaılas jemqorlyqpen kúres baǵytynda atqarylyp jatqan jumystarǵa qatysty birqatar suraq qoıyldy.
"Quqyqtyq statıstıkalyq málimetterge júginsek osy jyldyń 10 aıynyń qorytyndysymen sybaılas jemqorlyq sıpatynda 81 qylmys tirkeldi, ótken jylmen salystyrǵanda 26,4% tómendegen. Respýblıkadaǵy 17 óńirmen salystyratyn bolsaq tergeý óndirisinde bolǵan sybaılas jemqorlyq sıpatyndaǵy qylmystyq ister boıynsha bizdiń oblys 16-y pozısııada tur. Osy kórsetkishtiń ózi bizdiń bul saladaǵy jumystardyń oń nátıjesi dep bilemin", dedi Gúlshara Ábdiqalyqova.
Sondaı-aq, oblys ákimi azamattardyń aqparatqa qol jetimdigin qamtamasyz etý maqsatynda memlekettik organdardyń tarapynan qabyldanyp jatqan is-sharalarǵa toqtalyp, ashyqtyq prınsıpin ustanatynyn atap ótti.
Qazirgi tańda, oblystyq ákimdiktiń resmı ınternet-resýrsy arqyly kez-kelgen azamat memlekettik organdardyń atqaryp jatqan jumystary týraly aqparatty ashyq túrde alady. Salalyq basqarmalardyń jumysy, konkýrs habarlandyrýlary, normatıvtik quqyqtyq aktiler, óńirdegi barlyq jańalyqtar kún saıyn jańartylyp turady. Al, ashyqtyqtyń bir bóligi – qarjylarǵa baılanysty. Ákimdikterdiń ashyq bıýdjetterine arnalǵan ınteraktıvti karta ázirlengen. Onda barlyq salalardyń shyǵystary týraly tolyq aqparat alýǵa múmkindik bar.
"Elektrondy úkimet", "Ashyq dıalog" egov.kz portalynda turaqty túrde oblys ákiminiń qatysýymmen onlaın rejımde túrli taqyryptarda ınternet-konferensııalar ótkizilýde. Atap aıtsaq, 2020 jyly 12 ınternet-konferensııa josparlandy. Búgingi kúnge deıin 8 uıymdastyrylyp, túsken suraqtardyń barlyǵyna onlaın rejımde jaýap berildi.
Sonymen qatar, memleket tapsyrysy boıynsha salynyp jatqan qurylys nysandary týraly tolyq aqparatty arnaıy saıtta ornalastyryp, halyqqa qoljetimdi etý maqsatynda qurylys salasynda "Halyq monıtorıng" elektrondy júıesi iske qosylǵan.
Oblys ákimine kásipkerlik sýbektilerdiń zańdy múddeleriniń qorǵalýyn qamtamasyz etý boıynsha da saýal qoıyldy.
"О́ńirlik bıznes-ortada ákimshilik kedergilerdi jáne sybaılas jemqorlyq kórinisterin joıý, kásipkerlerdiń zańdy múddeleriniń qorǵaý úshin "Bıznesti jáne ınvestorlardy qorǵaý» jobasy iske asyrylýda. Bul joba aıasynda jyl basynan beri oblystaǵy ınvestorlar men kásipkerlerdi demeý úshin 6 sheteldik jáne 15 otandyq jobamen kelisim-shart jasaldy. Odan bólek, pandemııa kezinde bıznesti joǵaltpaý úshin 51 myńnan astam kásipkerge salyqtyq jeńildikter berilip, 4 myńnan astam kásipker mindetti áleýmettik-medısınalyq saqtandyrý tóleminen bosatyldy", dedi Gúlshara Ábdiqalyqova.
Munymen qosa, 9 myń saýda alańy jalpy somasy shamamen 700 mln.teńgege jýyq jaldamalyq tólemderdi óteýden bosatylǵan. Aýyl kásipkerlerin jeńildikpen nesıelendirýge baǵyttalǵan "Qyzylorda" óńirlik ınvestısııalyq ortalyǵynyń qyzmeti 2025 jylǵa deıin uzartyldy.
Sıfrlandyrý máselesine qatysty aǵymdaǵy jyly 7 baǵyt boıynsha 13 joba iske asýda.
Aımaq basshysy memlekettik qyzmet kórsetý, qalyptasqan epıdemıologııalyq ahýalǵa baılanysty bólingen bıýdjet qarajatynyń maqsatyna saı ıgerilýin baqylaý baǵytynda atqarylyp jatqan jumystarǵa da toqtaldy.