Elimizde kelesi jyldyń 10 qańtarynda Parlament Májilisi men máslıhat depýtattary saılaýy ótedi. Elimizdegi eń iri qoǵamdyq birlestik retinde Kásipodaqtar federasııasy mańyzdy ishki saıası prosesterden tys qala almaıdy. Olaı deıtinimiz bizdiń qatarymyzda 2 mıllıonǵa jýyq adam bar. Sondyqtan Kásipodaqtar federasııasy kezekti saılaýda eldiń saılaý zańnamasynyń barlyq normalarynyń saqtalýyn baqylaýǵa nıetti.
Bıliktiń zań shyǵarýshy tarmaǵyna eńbek adamynyń múddesin qorǵap, mártebesin kóterýge atsalysatyn adamdar kiretin bolsa, bizdiń jumysshylardyń quqyǵyn qorǵaýǵa baǵyttalǵan ortaq kúsh-jigerimiz jańa serpin alar edi. Sonymen birge bizdiń áleýmettik áriptesterimizben yntymaqtastyqqa negizdelgen birlesken jumysymyz qoǵamnyń negizgi demokratııalyq qundylyqtaryn saqtaýǵa múmkindik beredi. Birlik, ádilettik, damý – bul Qazaqstan Respýblıkasynyń Kásipodaqtar federasııasy qyzmetiniń basty qaǵıdattary.
Jalpy, federasııa – saılaýda baıqaýshy qyzmetin atqarýda óte tájirıbeli uıym. Byltyrǵy Prezıdent saılaýynda da belsendi boldy. Saılaý ýchaskeleriniń 50 paıyzǵa jýyǵynda daýys berý prosesiniń zańǵa saı ótýin qadaǵalaǵan edi. Sol sebepti de kásipodaq múshelerin bul qyzmette tájirıbesi mol deýge múmkindik bar. Ortalyq, óńirlik deńgeıde bolsyn osy mindetti joǵary deńgeıde atqaratynymyzǵa senim bildiremin. Baıqaý prosesi ońaı emes ekeni belgili, úlken jaýapkershilik artady. Baıqaýshylardy qoldaýda aldymyzǵa birneshe mindet qoıyp otyrmyz. Daýys berý, saılaýaldy naýqan kezinde jumys berýshilerdiń tarapynan eshqandaı qysymnyń, májbúrli daýys bergizýdiń bolmaýyn qadaǵalaımyz. Baıqaýshylar saılaý prosesiniń qanshalyqty zańǵa sáıkes ótip jatqanyn, saılaý komıssııalarynyń, partııa baıqaýshylarynyń quqyq buzýshylyq áreketterin baıqaǵan jaǵdaıda dereý tirkep, esep berýi kerek. Osyndaı kúrdeli prosesti baıqaýdy júıeli túrde uıymdastyrý da asa mańyzdy. Jumysty úılestirýshiler men baıqaýshylar mindetti túrde oqytamyz. Qazir mundaı sharalardyń kóbi onlaın ótip jatyr. Odan bólek aqparattyq vıdeo rolıkter daıyndalady. Bul jumys aldaǵy bir-eki aptada bastalady.
Táýelsiz baıqaýshylar ınstıtýty kez kelgen demokratııalyq qoǵamnyń úlken mańyzǵa ıe bóligi. Qurylym saılaýdaǵy zańsyz áreketterdi ashyq kórsetýi arqyly úlken jaýapkershilikke ıe. Azamattyq qoǵam, halyqaralyq uıymdar bolsyn bıylǵy saılaýǵa degen qyzyǵýshylyǵy joǵary. Kásipodaqtar federasııasynyń músheleri bul proseske óz úlesin qosýǵa saqadaı saı.
Nurlan О́TEShOV,
Kásipodaqtar federasııasy tóraǵasynyń orynbasary