Almatydaǵy "Dostyq" sport kesheninde áıelder kúresinen Qazaqstan chempıonaty óz máresine jetti. Bul básekede saqa sportshylarmen qatar, daryndy jastar da boı kórsetti. Bir ǵana táýlik ishinde olar 10 salmaq dárejesi boıynsha jeńimpazdar men júldegerlerdi anyqtady, dep habarlaıdy Egemen.kz.
Aıtýly jarystaǵy 76 kılo salmaqtyń fınaldyq saıysy kópshilik nazaryn ózine aýdardy. О́ıtkeni sheshýshi synda joldary qıysqan qos qarsylas ta óte myqty edi. Atap aıtsaq, qaraǵandylyq Elmıra Syzdyqova Azııa oıyndarynda bir márte jáne Azııa birinshiliginde bes ret jeńis tuǵyryna kóterilgen. О́skemendik Ekaterına Larıonova álem jáne qurlyq chempıonattarynyń qola júldeni enshilegen. Bul balýannyń ekeýi de 2016 jyly Rıo Olımpıadasynda úshinshi orynǵa taban tirep, alystaǵy Brazılııada kók baıraǵymyzdy bıikte jelbiretti. Ǵalamdyq dodada olar túrli salmaq dárejelerinde kúsh synasqan edi. Al Almaty tórindegi tartysta Elmıranyń basymdyǵy baıqaldy. Ekaterınadan aılasyn asyrǵan ol altynnan alqa taǵyndy.
Almaty oblysynyń namysyn qorǵaǵan qurlyq birinshiliginiń eki dúrkin júldegeri Aıaýlym Qasymova (62 kılo) men Azııa chempıony Jamılá Baqbergenova (68 kılo) ózderiniń myqtylyǵyn birden moıyndatty. Aqtyq synǵa deıin alqynbaı jetken Aıaýlym sheshýshi tusta óziniń komandalyq áriptesi Irına Kýznesovany qapy qaldyrsa, Jamılá Shyǵys Qazaqstan oblysynyń ókili Irına Kozıýlınaǵa shań qaptyryp ketti.
Nur-Sultannan kelgen burymdylar da babynda ekenderin baıqatyp, úsh ret jeńis tuǵyrynyń eń bıik satysyna kóterildi. Bul joly Svetlana Ankıcheva (50 kılo), Emma Tısına (57 kılo) jáne Dıana Kaıýmovanyń (57 kılo) baǵy jandy. Sondaı-aq qyzylordalyq Asylzat Saǵymbaı (53 kılo), shymkenttik Aısha Ýálıshan (55 kılo), Gaýhar Muqataı (65 kılo) jáne Valerııa Goncharova (72 kılo) syndy arýlar altyn medaldi moıyndaryna ildi.