Estafeta Dýshanbege joldandy

Úshinshi megapolıste «Shymkent – TMD elderiniń mádenı astanasy 2020» jylynyń saltanatty jabylý rásimi ótti. Bul maqsatta uıymdastyrylǵan is-shara Abaı saıabaǵyndaǵy poezııa jáne ádebıet buryshy kórmesinen bastaý aldy. Kitap kórmesine óńirlik aqyn-jazýshylardyń týyndylary qoıyldy. Merekelik shara «Piano Performance», ıaǵnı orys drama teat­ry aldynda túrli-tústi boıaýlarǵa boıal­­ǵan pıanınoda oryndalǵan mýzykamen jalǵasty. Mundaı kúısandyq qa­lanyń 5 jerine qoıylǵan. Ereksheligi kúısandyqta oınaı alatyn kez kelgen qala turǵyny ózi qalaǵan áýendi oınap, kelýshilerdiń yqylasyna bólenýge múm­kindik jasaldy. Saltanatty sharanyń negizgi bóligi Sıtadelde ótkenimen, qa­lanyń kórnekti oryndarynda poezııa jáne ádebıet, teatr men kıno, mýzyka, beıneleý óneri jáne qolóner sheberleriniń konsertteri men kórmeleri kórermen na­zaryna usynyldy. Máselen, Arbat ala­ńynda jıylǵan qaýym bes kásibı teatrdyń shyǵarmashylyq ujym­dary usyn­ǵan «Qyz Jibek», «Birjan-Sara», «Aıman-Sholpan», «Saıram bazary» qo­ıylymdarynan úzindiler men sırk ár­tisteriniń ónerin tamashalady. Al Abaı saıa­baǵynda «Ájeler» hory ha­lyq ánderin naqyshyna keltirip oryndady. Báıdibek bı alańynda qolóner she­berleriniń kór­mesimen jalǵasqan bar­lyq merekelik is-shara Ońtústik TV jáne YouTube-ta Bridge TV arnalarynda kórsetildi. Qala turǵyndary men qonaqtar Pre­zıdent Qasym-Jomart Toqaevtyń «Shym­kent 2020 – TMD elderiniń máde­nı astanasy» jylynyń saltanatty jaby­lý rásimine qatysýshylardy quttyqtaýyn tyńdady.

– Bıyl shyraıly Shymkent shahary Táýelsiz memleketter dostastyǵy elde­riniń mádenı astanasy retinde barshaǵa tanyldy. Bul – qala turǵyndary jáne búkil Qazaqstan halqy úshin zor jetistik. Osy ıgi bastama tól mádenıetimiz ben óne­rimizdi tanytyp, qazaqtyń salt-dás­tú­rin nasıhattaýǵa mol múmkindik berdi. Son­daı-aq rýhanı qundylyqtary sabaqtas ha­lyqtar arasyndaǵy yntymaqtastyq­ty odan ári nyǵaıtýǵa jol ashty. Shym­kent jurtshylyǵy men ónerpazdary osyn­daı mártebeli mindetti abyroımen at­­qa­ryp shyqty. Karantın talaptaryna sáı­kes belgilengen jospardaǵy onlaın for­matyndaǵy sharalar joǵary deńgeıde uıym­dastyryldy. О́zderińizge shynaıy rı­za­shylyǵymdy bildiremin!

«Mádenı astana» mártebesin Tájik­­stannyń Dýshanbe qalasyna tabys­taǵaly otyrmyz. Elderimiz arasyndaǵy mádenıet kerýeni tolastamasyn! Dosty­ǵymyz ben syılastyǵymyz arta bersin! Barshańyzǵa amandyq, baq-bereke jáne shyǵarmashy­lyq tabys tileımin, delingen Prezıdent quttyqtaýynda.

Iá, 2021 jyly TMD elderiniń mádenı astanasy mártebesine Dýshanbe qalasy ıe bolyp otyr. Shymkent qalasynyń ákimi Murat Áıtenov tájikstandyq delegasııa ókilderine estafetany tapsyra otyryp, «Dostyq syıy» atty toptama tartý etti. Qa­zaq halqynyń darqan da qonaqjaı bol­­mysyn bildiretin «Dostyq syıyna» Shym­­kenttiń 2200 jyldyq tarıhy ja­zyl­­ǵan 2200 kitap, qalanyń sımvolyna aınal­ǵan qyzǵaldaqtyń 2200 túbi jáne qala tur­ǵyn­­darynyń dýshanbelikterge ystyq le­bizi men sálemi jazylǵan 2200 ashyq hat qosylǵan.

– «Shymkent – TMD elderiniń máde­nı astanasy» jyly búkil álemdi jaılaǵan pandemııamen tuspa-tus keldi. Soǵan qaramas­tan, osy jyl aıasynda shymkenttikter óz­deriniń eńbekqor, meıirimdi, dostyqqa adal ári jańashyldyqqa beıim ekenin kórsete bildi. Karantın dostyǵymyzǵa sy­zat túsire alǵan joq. Shymkent – 2200 jyl­dyq tarıhy bar kóne shahar. Qa­la­myzdyń tarıhy ejelgi dáýirlerden bas­talatynyn halyqaralyq bedeldi uıym – IýNESKO da resmı málimdedi. Tarıhı qa­lamyzdyń TMD elderiniń mádenı astanasy atanýy biz úshin úlken maqtanysh. Tuńǵysh Prezıdentimiz, Elbasy Nursultan Ábishuly Nazarbaevtyń Jarlyǵymen shýaqty Shymkentke respýblıkalyq ma­ńyzy bar qala mártebesiniń berilýi abyroıymyzdy asyrdy. Memleket basshysy Qasym-Jomart Kemeluly Toqaev el qýa­tyn arttyrýdaǵy Shymkent qalasynyń aıryqsha mańyzyna kóńil bólýde. Pre­zıdenttiń TMD elderiniń mádenı astanasy jylynyń sátti aıaqtalýymen arnaıy quttyqtaýyn ózderińiz de estidińizder. Shym­kent qalasy turǵyndarynyń atynan Memleket basshysyna shyn júrekten alǵys bildiremiz. Bizdiń qalamyz búginde búkil Azııanyń óneri men mádenı murasy toǵysqan iri ortalyqqa aınalyp otyr.

Ejelgi kezeńderden Shymkent tur­ǵyn­darynyń boıynda erekshe qasıet qalyp­tasty. Bul – iskerlik, qonaqjaılylyq já­ne ózgeriske degen beıimdilik. Shymqala to­pyraǵynan túlep ushqan ár azamattyń bo­ıynda elge degen súıispenshilik, dástúrge degen beriktik, dostyqqa degen adaldyq or­nyqqan. Mádenı astana sheńberinde qala­myzda 1700-den astam jańashyl, onlaın formattaǵy jobalar júzege asty. Qa­lamyzdyń mártebesin arttyrǵan osy is-sharalardy ótkizýge kómekshi bolǵan barlyq shymkenttikterge alǵysymdy bil­diremin! Karantın bizdiń ǵasyrlarǵa jalǵasqan halyqaralyq baılanysymyz­dy ajyrata alǵan joq. Oqshaýlaný kezinde de dostyǵymyz ben yntymaǵymyzdyń jáne bekem birligimizdiń nátıjesinde syn­darly sátten súrinbeı óttik. Biz búkil TMD elderine ortaq rýhanı qundylyqtar – mádenı-ádebı, tarıhı muralarymyz­dy nasıhattaý men baılanysymyzdy nyǵaı­tý úshin toptasa bildik.

Dostyq estafetasyn Uly Jibek jo­lymen baýyrlas el Tájikstannyń astanasy Dýshanbege joldaımyz. Qazaq hal­qynyń ulttyq dástúriniń izimen estafeta kerýenin 2200 jyldyq tarıhy bar Shym­kentten tartý-taralǵymen shyǵaryp salǵaly otyrmyz, dedi qala ákimi.

Úlken senim men jaýapkershilik ar­­tylǵan abyroıly jyldy osylaı qo­ry­­tyndylaǵan Shymkent qalasynyń ákimi Murat Áıtenov TMD elderiniń má­denı astanasy estafetasyn Dýshanbe qa­la­sy­nyń tóraǵasy Rýstamı Emomalıge ta­bys etti. Sondaı-aq onlaın-jıyn­da TMD Atqarýshy komıtetiniń tór­aǵasy – Atqarýshy hatshy S.Lebedev, Mem­le­ketaralyq gýmanıtarlyq yntymaq­tas­tyq qory basqarma tóraǵasy, Ázer­baıjan Respýblıkasynyń Reseı Fe­de­rasııasyndaǵy Tótenshe jáne óki­let­ti elshisi Polad Bıýlbıýlogly qala tur­ǵyndary men qonaqtaryna arnaıy mere­kelik quttyqtaý tilegin jetkizdi. Má­denı astana jylynyń jabylýy aıasynda 6 ­teatr, 5 kitaphana, sırk, zoobaq, ádet-ǵu­ryp jáne salt dástúr ortalyǵy, Máde­nıet úıi jáne basqa da mádenıet mekemeleri­niń shyǵarmashylyq ujymdarynyń kúshimen 48 spektakl, 99 onlaın is-shara, 7 jyl­jymaly teatrlyq, 5 mýzykalyq per­fo­­manstar, aqyndar, jazýshylar, áde­bı qaı­ratkerler beınesindegi boıly qýyr­shaqtar sherýi, jas sýretshilerdiń kórmesi men ǵı­marattardyń qasbetterinde 7 mý­ral­dyń tusaýkeseri uıymdastyryldy.

Aıta keteıik, uıymdastyrylǵan sharalar karantın talabyn saqtaı otyryp, barlyq kelýshilerge saqtyq jóninde eskertpeler jıi eskertilip otyrdy.

ShYMKENT