Ulttyq kınony qoldaý memlekettik ortalyǵy qarjylandyrǵan "Na starte" qazaqstandyq kartınanyń túsirilimi aıaqtalýǵa jaqyn, dep habarlaıdy Egemen.kz
"Na starte" fılminiń jelisi boıynsha ákeden aıyrylǵan aǵaıyndylar qylmystyq jolǵa túsedi. Olardy talantty jastardy izdeý úshin qaladan aýylǵa kelgen jeńil atletıka sportynyń jattyqtyrýshysy baıqap qalady. Aǵaıyndylar jańa synaqtarǵa tap bolady. Qaıǵyly jaǵdaı olardyń ómirin ózgertedi. Aǵaıyndylardyń birine júgirý marafonyna qatysyp, álem chempıonyn jeńý qajet.
Kartına Golden Man Media kınostýdııasynda túsirildi. "Na starte" fılmi qazaqstandyq prokatqa 2021 jyly shyǵady.
Kartına rejısseri Ernar Nurǵalıev. Ol kópshilikke "Zolýshka Zaýre", "О́geı júrek", "Súıe bilseń", "Súıe bilseń-2", "Mahabbatym júregimde", "Kelinjan-1", "Kelinjan-2" telehıkaıalary, "Brat ılı brak", "Stansııa sýdby" kórkem fılmderi, "Janym, ty ne poverısh!" komedııasy, "Iа lıýblıý tebıa" melodramasy, "Sisitay" mıýzıkli arqyly tanymal.
Kartınanyń ekinshi rejısseri Alan Ábdibaev.
"Na starte" kartınasyna 2019 jyly pıtchıng jobasynyń aıasynda Qazaqstan Respýblıkasynyń Mádenıet pen Sport mınıstrliginen qoldaý kórsetildi. Qarjylandyrý Ulttyq kınony qoldaý memlekettik ortalyǵynyń tarapynan júrgizildi.
"Na starte" kórkem fılmi ol naǵyz motıvasııalyq sport dramasy. Karantın saldarynan kartına jumystaryn júrgizý qıynǵa soqty. Fılmniń alǵashqy qoıýshy rejısseri reseılik azamat Indar Djendýbaev boldy. Ol kartınada jarty jyldan astam jumys istedi. Biraq Qazaqstandaǵy tótenshe jaǵdaıǵa baılanysty ol óz eline ketýge májbúr boldy. Qazirgi jaǵdaıǵa baılanysty ssenarııge ózgeris engizýge týra keldi. Bolashaqta keń kólemdi massalyq sahnalardy túsire almaıtynymyzdy túsindik. Bul oraıda men Ernar Nurǵalıevke habarlasyp, fılm jumystaryn jalǵastyrdyq. Pandemııa túsirilim jumystaryna kóptegen ózgerister engizdi, Túsirilim alańynda qaýipsizdik sharttaryn saqtadyq", deıdi kartınanyń bas prodıýseri Maksım Akbarov.
Atalǵan fılm Almaty, Almaty oblysynda jáne "Altyn Emel" ulttyq saıabaǵynda túsirildi. Jaqyn arada túsirilim toby Birikken Arab Ámirliginde baryp, kınoǵa qajetti materıaldardy jınaqtap, kıno montajyna kirisedi.
Fılmge Aıbasov Jandos, Erbol Semkýlov, Erik Joljaqsynov, Karına Kýdekova synda akterler tústi. Fılmge qazaq tilinde dýblıaj jasalady. Prokattyq reıtıng 12+ jas.