18 qarashada qyzdy sýısıdten qutqarǵan Qaraǵandy qalasynyń patrýldik polıseılerin IIM-de marapattaý rásimi ótti, – dep habarlaıdy Polisia.kz.
Ishki ister mınıstri patrýldik polısııa polki qyzmetiniń ınspektorlary Beıbit Baıserkınge, Daryn Sovetke jáne polıseı-kınolog Aıbat Ákimjanovqa jedel jáne úılesimdi is-áreketteri úshin jeke alǵysyn bildirip, polıseılerdi IIM-niń “Quqyq tártibin qamtamasyz etýge qosqan úlesi úshin” medalimen marapattady.
– Kún saıyn búkil el boıynsha myńdaǵan polısııa qyzmetkerleri azamattardyń qaýipsizdigi men tynyshtyǵyn qamtamasyz etý, olardy qylmystyq qol suǵýshylyqtan qorǵaý úshin qyzmet atqarady. Polısııa qataryna kirgenderdiń barlyǵy bizdiń mamandyǵymyz janqııarlyqty, batyldyqty jáne qıyn ómirlik jaǵdaıǵa tap bolǵan adamdarǵa kómektesýge daıyn bolýdy talap etetinin túsinedi. Sol úshin ómirlerin táýekelge tigýden de bas tartpaıdy. Men tek ataq-dańq úshin emes, júreginiń qalaýy boıynsha erlik jasaǵan árbir ishki ister organdarynyń qyzmetkerin maqtan tutamyn, – dep atap ótti marapattaý rásimi kezinde IIM basshysy Erlan Turǵymbaev.
Esterińizge sala keteıik, aǵymdaǵy jyldyń 18 qarashasynda Qaraǵandy qalasynyń turǵyny 8-qabattan sekirýge tyrysqan bolatyn. Ony oqıǵa ornyna kelgen Qaraǵandy qalasynyń patrýldik polısııa polkiniń qyzmetkerleri qutqardy. Qyz aýyr psıhologııalyq kúıde boldy, kez-kelgen ýaqytta jospardy júzege asyrýǵa daıyn edi. Qabyldanǵan sharalardyń arqasynda polıseıler ózine-ózi qol jumsaý áreketine jol bermeı, odan ári kómek kórsetý úshin qyzdy medısına qyzmetkerlerine tapsyrdy.