Búgin QR Ekologııa, geologııa jáne tabıǵı resýrstar mınıstrligi Facebook paraqshasyndaǵy tikeleı efırdegi jıynda Ekologııalyq retteý jáne baqylaý komıtetiniń óńirlik jetekshilerimen oblystardaǵy ekologııalyq ahýaldy jaqsartý boıynsha Jol kartalary talqylandy.
Aıta keteıik, Ekologııa mınıstri Maǵzum Myrzaǵalıevtiń qatysýymen buǵan deıin barlyq óńirdiń qoǵam ókilderimen, ekobelsendilermen aımaqtardaǵy ekologııalyq ahýal boıynsha 17 onlaın-kezdesý ótip, olarǵa 25 myń qazaqstandyq qatysqan. Olardyń usynystary eskerile otyryp, nátıjesinde qorshaǵan orta ahýalyn jaqsartý jónindegi naqty sharalardy kózdeıtin 17 Jol kartasy daıyndaldy. «О́ńirlerdegi negizgi ekologııalyq problemalarǵa atmosferalyq aýanyń, betki sýlardyń lastanýy, qatty turmystyq qaldyqtardy qaıta óńdeý deńgeıiniń tómendigi men qoqys alańdarynyń tolyp ketýi, sonymen birge tarıhı lastaný oryndary jatady. On qalada lastaný ındeksi joǵary, ıaǵnı 7 men 10 kórsetkishteriniń arasynda. Olar – Nur-Sultan, Almaty, Shymkent, Qaraǵandy, Jezqazǵan, Aqtóbe, Atyraý, О́skemen, Temirtaý, Balqash qalalary», - dedi Ekologııalyq retteý jáne baqylaý komıtetiniń tóraǵasy Zulfuhar Joldasov. Jol kartalary tolyq júzege assa atalǵan qalalardaǵy lastaný ındeksi ortasha deńgeıge tómendeıdi. Mysaly, Zulfuhar Joldasov Almaty qalasynyń ekologııasyn jaqsartý úshin 20 is-shara qarastyrylǵanyn málimdedi. «Negizgileri – JES-1 men JES-3-ti jáne jeke sektorlardy gazǵa kóshirý, qoǵamdyq kólikterge birtindep dızel otynymyn júrýge tyıym salý, jasyl jelekter aýmaǵyn 1427-den 1928 gektarǵa deıin jetkizý jáne jel rejımin zerttep, sonyń nátıjesi boıynsha qalanyń arhıtektýralyq kelbeti Erejesin ózgertý, qurylystardyń Bos josparyna túzetýler engizý jumystary. Osy sharalardyń nátıjesinde qaldyqtar kólemi 144 myń tonnadan 79 myń tonnaǵa nemese 44%-ǵa deıin azaıady. Sonda lastaný ındeksi joǵary 8 kórsetkishinen 6-ǵa túsedi», - dedi Z.Joldasov. Jol kartalaryndaǵy is-sharalar 2024 jylǵa qaraı Aqtóbe men Atyraý oblystaryndaǵy atmosferalyq aýanyń lastaný ındeksin joǵary 7-den 5-ke, Shyǵys Qazaqstan oblysynda 7-den 6-ǵa, Qaraǵandy oblysynda 9-dan 6-ǵa túsiredi. «Jol kartalary Qaldyqtardy qaıta óńdeý deńgeıin aǵymdaǵy 15%-dan 30%-ǵa deıin jetkizýge, 24 jańa polıgondar salýǵa jáne tolyp ketken bes 5 polıgondy qalpyna keltirýge jáne joıýǵa, ejelden lastanǵan jerlerdi qalpyna keltirýge jáne joıýǵa, 7 jańa kárizdik tazartý keshenderin salýǵa jáne 12 kárizdik tazartý keshenderin qaıta jańǵyrtýǵa, eldi mekenderde 15 mln. jáne orman alqaptarynda 2 mlrd. aǵash otyrǵyzýǵa múmkindik beredi», - dedi Zulfuhar Joldasov. Tikeleı efırde ár óńirdiń Jol kartasy jeke-jeke talqylanyp, barlyq óńirlik departament basshylary qorshaǵan orta jaǵdaıyn jaqsartý jónindegi josparlaryn tanystyrdy. Zulfuhar Joldasov qoǵam ókilderiniń - ekobelsendileriń qatysýymen Jol kartalarynyń oryndalýyn baqylaıtyn Ekologııalyq keńes qurýǵa, is-sharalardy óz merziminde júzege asyrýǵa tapsyrma berdi.