О́zgerister joly: Ár adamǵa laıyqty ómir! (Nur Otan partııasynyń HH sezi ótti)

Nur Otan el taǵdyryna jaýapty

Jıynda Elbasy sońǵy bes jyl ishinde partııa óziniń saılaý aldynda bergen ýádeleriniń basym bóligin oryndaǵanyn atap ótti. Qazaqstannyń Tuńǵysh Prezıdenti sońǵy bir jyldyń ishinde partııa jumysyn qaıta jandandyrý baǵytynda aýqymdy júıeli ister atqarylǵanyna nazar aýdartty.

«Qazaqta «júre berseń, kóre bere­siń» degen sóz bar. Minekı, sezdi qashyq­tan ótkizýge májbúr bolyp otyrmyz. Osyn­daı zamanǵa tap keldik. Bul da ómiri­mizdiń bir belesi retinde este qalady. Aman­shylyq bolsa, aldaǵy ýaqytta kezdesip, shúıirkelesip, júzdesip, qushaqtasatyn bolarmyz. Sol kúnge tezirek jetkizsin», dedi sezd jumysyn ashqan Elbasy.

Budan keıin Memleket basshysy Qasym-Jomart Toqaevqa sóz berildi. О́z sózinde Prezıdent Qazaqstan qazirgi ahýal­ǵa qaramastan strategııalyq damý maq­­sattaryn dáıekti túrde iske asyr­ǵanyn jetkizdi.

«Partııamyzdyń kezekten tys XX sezi kúrdeli ári mańyzdy kezeńde ótkizi­lip otyr. Bul – memleketimizdiń qoǵam­dyq-saıası ómirindegi aıtýly oqıǵa. Bú­ginde Nur Otan partııasy el taǵdyryna jaýapty eń basty saıası kúshke aınaldy. Halqymyz bizge qashanda zor senim arta­dy. Ásirese jahandyq daǵdarys kezinde el amanatyna erekshe kóńil bólýi­miz kerek. Búkil álemge taraǵan pande­mııa Qazaqstanǵa da ońaı tıgen joq. Memleket azamattarymyzdyń densaý­lyǵyn qorǵaý úshin barlyq qajetti sharalardy qabyldap jatyr», dedi Q.Toqaev.

Memleket basshysy partııa tarapynan halyqqa udaıy qoldaý kórsetilip kele jatqanyna toqtaldy. Partııa bel­sen­dileri jáne eriktileri muqtaj jandardan kómegin aıamaǵanyn atap ótti.

«Osyndaı naqty jumys pen jana­shyrlyq bereke-birligimizdi arttyra túsedi. Qazaqstan qazirgi ahýalǵa qara­mas­tan strategııalyq damý maqsattaryn dáıekti túrde iske asyrady. Bul rette Elbasy saıasatynyń sabaqtastyǵyn qamtamasyz etý – negizgi mindettiń biri. Men bıylǵy Joldaýymda partııanyń qoǵamdaǵy jetekshi róli týraly aıttym. Biz reformalardy júzege asyrý barysynda Nur Otan partııasynyń zor áleýetine súıenemiz», dedi Q.Toqaev.

Aıta keteıik, Memleket basshysy Qasym-Jomart Toqaevtyń Nur Otan partııasynyń kezekten tys XX sezinde sóılegen sózi osy maqaladan bólek, jeke berilip otyr.

Qazaqstannyń Tuńǵysh Prezıdenti mereıtoılyq sezde sóılegen sózinde Nur Otan partııasy elimizdegi eń basty saıası kúsh ekenin atap ótti. Partııa Tóraǵasy elimizdiń táýelsizdik jyldaryndaǵy negizgi jetistikterine toqtaldy.

«Ár partııa úshin sezd ótkizý – óte úlken másele, óte úlken kezeń, óte úl­ken jumys sanalady. Sezd ótken saıyn ót­kenge qarap, qandaı tabystarǵa jetkeni­mizdi, halyq aldyndaǵy baǵdarla­ma­myzdyń oryndalý barysyn qorytyn­dy­laımyz. Búginde Nur Otan partııasy eli­mizdegi eń basty saıası kúshke aınalǵanyn kórip otyrmyz. Osy jyldardyń ishinde partııa ishki turaqtylyqtyń tiregine aı­naldy. Halyqtyń ál-aýqatyn arttyrý jolynda aıanbaı jumys istedi. Munyń bári partııanyń el bolashaǵyna senimi berik azamattardy biriktirýiniń arqa­synda múmkin boldy. 30 jylda qan­daı qıynshylyqtardan ótsek te, eli­miz aıtarlyqtaı ósip-óndi, halyqtyń ál-aýqaty jaqsardy. Jalpy, osy jyl­dar­dyń ishinde basqa ult ósip shyqty. Bári kóz aldymyzda. Az ýaqyttyń ishinde memleket quryp, shekarany bekitip, jańa astananyń irgesin qaladyq.

Is júzine keler bolsaq, onyń artynda qanshama atqarǵan is, jumys, qanshama qıynshylyq pen tartys jatyr. Tek Reseımen aradaǵy 7 500 shaqyrym shekaranyń ár shaqyrymyn shegendeý, ár aýyl tóńireginen ótý óte qıyn boldy. Mysaly, О́zbekstanmen shekarany shegendegen kezde bir úıdiń bir bólmesi Qazaqstanda, bir bólmesi О́zbekstanda qala jazdaǵan da jaǵdaı kezikti. Sonyń bárin sheshýge týra keldi. 14 myń shaqyrymǵa sozylǵan shekaramyz tuńǵysh ret shegendelip, BUU-ǵa tapsyrdyq. Shekarasy joq el memleket emes. Shekarasyz el bolmaıdy.

Taǵdyrdyń jazýymen álemniń ár qıyryna tarydaı shashylǵan 1 mln-nan astam qandasymyzdy elge qaıtardyq. Ol prosess áli toqtaǵan joq. Áli de kelip jatyr. Kelemiz degen azamattardyń barlyǵyn Qazaqstan qushaq jaıa qarsy alyp, múmkindiginshe kómektesedi», dedi Tuńǵysh Prezıdent.

 

Otyz jylda atqarylǵan sharýa mol

Elbasy óz sózinde uzaq jáne qıyn joldy júrip ótkenin eske saldy. Memleket pen birtutas qazaqstandyq ulttyń qalyptasýy osy júrip ótken joldyń úlken jetistigi sanalady.

«30 jyl ishinde Qazaqstan aıtarlyqtaı áleýmettik jáne ekonomıkalyq jetis­tikterge jetti. Buǵan, eń aldymen, naryq­tyq ekonomıkaǵa kóshýdiń jáne eldi jań­ǵyrtýǵa baǵyttalǵan túbegeıli reformalardy júzege asyrýdyń nátıjesinde qol jetkizdik. Naryqtyq reformalar, ındýstrııalandyrý jáne shetelden kelgen ınvestısııa ónimdilikti arttyrýǵa qozǵaýshy kúsh boldy. Sondaı-aq ekonomıkalyq ósim­di qamtamasyz etip, jańa jumys oryn­daryn ashýǵa jáne qoǵamnyń áleýmet­tik bólinisin azaıtýǵa múmkindik berdi», dedi Elbasy.

Nursultan Nazarbaev Qazaqstannyń táýelsizdik jyldarynda etnostyq ártúr­lilikti artyqshylyqqa aınaldyryp, óziniń ulttyq biregeı standartyn qa­lyptastyrǵanyn atap ótti. Osy úderistegi negiz­gi ról, Elbasy atap ótkendeı, Qazaq­stan halqy Assambleıasyna júktelgen.

«Ekonomıkalyq ósim joǵary bolǵan kezeńde qurylǵan Ulttyq qor qarjy salasyndaǵy «qaýipsizdik qalqanymyzǵa» aınaldy. Biz 1 400 jańa aýrýhana men emhana, 1 800 mektep jáne 900 balabaqsha salý arqyly áleýmettik ınfraqurylymdy jańart­tyq. «Qazaqstan – 2050» strategııasy aıasynda Ekonomıkalyq ynty­maqtastyq jáne damý uıymy elderiniń standarttaryn basshylyqqa alyp otyr», dedi Qazaqstannyń Tuńǵysh Prezıdenti.

Elbasy Nur Otan partııasynyń pandemııa kezindegi jumysyna, sondaı-aq partııany qaıta jańǵyrtý úderisine toqtaldy.

«Bizdiń partııa – basqarý isinde tájirıbesi mol jáne barlyq óńirde kadrlyq áleýeti zor eń iri saıası kúsh. Quramynyń sapasy boıynsha Nur Otan búkil Qazaqstan qoǵamynyń keskinin kór­setedi. Sondyqtan biz aldaǵy ýaqytta da memleketimizdiń jáne barsha jur­ty­myzdyń ál-aýqatyn arttyrý úshin eńbek etýge nıettimiz», dedi Qazaqstannyń Tuńǵysh Prezıdenti.

Nursultan Nazarbaev partııanyń árdaıym negizgi úsh qaǵıdany basshylyqqa alǵanyn jáne aldaǵy ýaqytta da sony ustanatyndyǵyn atap ótti. Bul – jaýap­kershilik, judyryqtaı jumylý, ortaq murat-maqsattarǵa adaldyq.

«Búgin jarııalanyp otyrǵan Nur Otan partııasynyń baǵdarlamasy – qarjy­lyq, adamı jáne basqa da resýrstarmen qamtamasyz etilgen jáne jan-jaqty tarazylanǵan órshil maqsattar men mindetter. Baǵdarlama – qolǵa alǵan refor­malarymyzdyń zańdy jalǵasy. Men Táýelsizdik jyldary árdaıym naqty maqsattardy belgiledim. Solarǵa jetý úshin túrli qıyndyqty jeńip, aıanbaı ter tógý kerek dep aıtyp kelemin», dedi Nur Otan partııasynyń Tóraǵasy.

Elbasy partııanyń reforma júrgizý tájirıbesi mol jáne barlyq josparlardy júzege asyrýǵa saıası erik-jigeri jetkilikti ekenin basa aıtty.

«Partııanyń jańa baǵdarlamasy oryndalady. Bul qujat eldi odan ári jań­ǵyrtýǵa jáne barlyq qazaqstandyqtardyń turmys sapasyn jaqsartýǵa jol ashady. Saılaý naýqanyn oıdaǵydaı ótkizý úshin partııa respýblıkalyq jáne aımaqtyq shtabtardyń jumysyn úılesimdi uıym­dastyrý qajet. Kandıdattar, belsendiler, senimdi ókilder barlyq aımaqtardy aralap, ár saılaýshyǵa jetýi kerek», dedi Qazaqstannyń Tuńǵysh Prezıdenti.

Sondaı-aq Elbasy keler jyly Qa­zaqstannyń táýelsizdik alǵanyna 30 jyl tolatynyn atap ótip, bul mańyzdy kezeń ekenin eske saldy.

«Prezıdent Qasym-Jomart Kemeluly Toqaev saılaýaldy baǵdarlamanyń negizgi baǵyttaryna toqtaldy. Biz ony tolyq júzege asyrýymyz kerek. Baǵdarlamany oryndaý arqyly qıyndyqtardy eńserip qana qoımaı, halyqtyń ómir súrý sapasyn arttyryp, elimizdiń tabysty damýyn qamtamasyz etýge jol ashýymyz qajet. Keler jyly ulan-baıtaq dalamyzda Táýelsiz memleket qurǵanymyzǵa 30 jyl tolady. Bul – óte qasıetti kezeń. Ata-babamyzdyń qanymen, analarymyzdyń terimen kelgen. Sondyqtan qolymyzǵa túsken osy teńdesi joq altyndy alyp júrý bizdiń moınymyzǵa júktelgen paryz.

О́tken ǵasyrda halqymyz túrli alapatty bastan keshirdi. Ekinshi dúnıejúzilik soǵys, zulmat asharshylyq, ult-azattyq qozǵalystar, qýǵyn-súrgin jyldarynda 4 mln adam qyrshyn ketip, 1,5 mln qazaq bosqynǵa aınalyp, shet memleketterge bas saýǵalady.

Bul – ultymyz úshin aýyr qasiret. Qaı halyq osyndaı qasiretti basynan keshirgen eken?! Soǵan qaramastan, hal­qymyz ata-babamyz qaldyrǵan jerinde óziniń memleketin quryp otyr. Elordasyn eldiń ortasyna ákep ornattyq. Dúnıege elimizdi pash ettik.

«Taǵdyrdyń tezinen, tozaqtyń ózi­nen» ótip, «myń ólip, myń tirilgen», Táýel­sizdiktiń tátti dámin sezingen halqy­myz­dyń endi ne istese de joldasy sabyr men aqyl ǵana bolýy kerek», dedi Nursultan Nazarbaev.

Nursultan Nazarbaev Respýblıkalyq saılaýaldy shtabtyń jetekshisi bolýǵa partııa Tóraǵasynyń birinshi orynbasary Baýyrjan Baıbektiń kandıdatýrasyn usyndy.

Budan ári sezd jumysyn júrgizý Nur Otan partııasy Tóraǵasynyń Birinshi orynbasary Baýyrjan Baıbekke tapsyryldy. B.Baıbek 18 qarashada ótken Nur Otan partııasy fraksııasynyń otyry­synda «Qazaqstan 2021: Birlik. Turaq­tylyq. Jasampazdyq» saılaýaldy baǵ­dar­lamasynyń oryndalýy boıynsha Premer-Mınıstrdiń esebi tyńdal­ǵanyna toqtaldy. Sonymen qatar saıası keńes Nur Otan partııasynyń jarǵysyna praı­merız ótkizýge jáne partııa doktrınasyn budan bylaı saıası platforma dep ataýǵa qatysty ózgertýler men tolyq­tyrýlar daýysqa salynǵanyn jetkizdi.

«Elbasynyń, partııa Tóraǵasy Nur­sultan Nazarbaevtyń atyna «Edınaıa Rossııa» partııasy tóraǵasy, Reseı federasııasy Qaýipsizdik keńesi tóraǵasynyń orynbasary Dmıtrıı Medvedevtiń, Qytaı kommýnıstik partııasy Ortalyq komıtetiniń bas hatshysy, Qytaı halyq respýblıkasy basshysy Sı Szınpınniń, Túrkııa prezıdenti, Ádilet partııasynyń tóraǵasy Redjep Taııp Erdoǵannyń, Japonııa premer-mınıstri Ioshıhıde Sýgeniń jáne aımaqtaǵy basqa da kóshbasshy partııalar atynan quttyqtaý hattar kelip tústi», dedi B.Baıbek.

 

Bıznes pen qoǵamdy baılanystyratyn kópir

Budan keıin jaryssózge Nur Otan partııasynyń delegattary qatysyp, óz pikirimen bólisti. Partııanyń Qaraǵandy oblysy Ulytaý aýdany fılıalynyń tóraǵasy, osy aýdannyń ákimi Berik Ábdiǵalıuly halqymyzdyń óte jaýapty kezeńdi bastan keship otyrǵanyn jetkizdi.

«Álemge jaıylǵan pandemııa, saıası qaıshylyqtar men qarjylyq qıyn­dyq­tar beleń aldy. Munyń bári – bizdiń elge de áser etetini sózsiz.Osyndaı shaqta otyz jyldyq belesti eńsergen Táýelsizdigimizdiń tuǵyryn nyǵaıtyp, maqsatymyzdy bir arnaǵa toǵystyrý – aldymyzda turǵan eń ózekti másele.

Qazaq eli búginde – ult pen ulystyń basyn qosyp, bir atanyń balasyndaı tatýlyq ornatqan shýaqty shańyraq. Bul – shańyraqtyń dińgegin kóterip, óz qolymen ýyǵyn qadaǵan Elbasymyzdyń eren eńbegi. Nur Otan partııasy «qaıta jandanýdy» qolǵa alyp, partııanyń aldyn ala saılaýyn ótkizdi.

Aýdandyq partııa fılıalynyń tór­aǵasy retinde arnaıy osy praımerızge qatysyp, óńirlik saılaýaldy baǵdar­la­mamyzdy jerlesterimizdiń aldynda talqylap, qorǵap shyqtyq.

Osy joly respýblıka boıynsha árbir aýdan, qala, oblys partııa fılıaldary árbir aımaqtyń ereksheligin eskeretin 216 óńirlik arnaıy baǵdarlamasyn qabyldap, el aldynda sony oryndaýǵa mindet aldy. Prezıdentimiz Qasym-Jomart Kemeluly tanystyrǵan Partııanyń saılaýaldy baǵdarlamasy – osy qujattardyń jıyntyǵy dep aıtýǵa ábden bolady.

Memleket basshysynyń jaqynda ǵana jarııalaǵan Joldaýyndaǵy refor­ma­larǵa negizdelgen kesek-kesek baǵyt­tardan turatyn bul qujat – iske asyrýǵa yńǵaıly, barlyq shyǵyndary eseptelgen naqty baǵdar. Mańyzdysy, qarapaıym azamattardy memlekettik deńgeıdegi sheshim qabyldaýǵa jáne olardy júzege asyrýǵa aralastyrý kózdelgen.

«Halyq únine qulaq asatyn memleket» tujyrymdamasy aıasynda Nur Otannyń «tikeleı baılanystyń» jańa formattaryn engizip jatqany qýantady. Bul, bir jaǵynan, qoǵamnyń jaýapkershiligin arttyrsa, ekinshi jaǵynan, sybaılas jemqorlyqtyń aldyn alýǵa yqpal etedi.

Aýyldyń turǵyny retinde baǵdar­lamada «Aýqatty aýyldar» bólimniń bolǵany qatty qýantady. О́ıtkeni Aýyl – ultymyzdyń berekesi. Aýyldyń ómir sapasyn jaqsartý – eń aldymen halyqtyń ózi jıi kóteretin gaz, aýyz sý, jol, ınternet pen mobıldik telefon baılanysy máselelerin sheshý. Osynyń bárimen aýyldardy jaqyn arada qamtý baǵdarlamada naqty qarastyrylǵan.

Dál osyndaı sheshimder ekonomı­ka­myz­dyń basqa baǵyttaryna da arnal­ǵan. Bulardy oıdaǵydaı iske asyrýǵa Pre­zıdent janyndaǵy Joǵarǵy ekono­mı­kalyq keńes, jaqynda qurylǵan Stra­te­gııalyq josparlaý jáne Básekelestik agenttikteri sııaqty naqty tetikteri úlken sep bolady dep senemiz», dedi B.Ábdi­ǵalıuly.

Sondaı-aq jıyn barysynda Almaty oblysy Jambyl aýdanyna ótken praımerız jeńimpazy, belgili jýrnalıst, 9 balanyń anasy Álııa Ábsemetova sóz sóıledi.

«Búgingi sezde sizderdiń aldyńyzda sóz sóıleý men úshin zor qýanysh. Men – kópbalaly anamyn, jýrnalıspin ári volon­termin. Almaty oblysynyń Qarǵa­ly aýylynan osynaý úlken minberge praımerız arqyly kelip otyrmyn.

Sońǵy úsh aı men úshin úlken qarba­las­pen ótti. О́zim turatyn aýdandaǵy 24 aýyldyq okrýgti túgel aralap, tur­ǵyn­darmen kezdestim. Olarǵa partııamyzdyń baǵdarlamasyn túsindirdim, amanattaryn jınadym. Debat kezinde partııanyń saılaýaldy baǵdarlamasyn jan-jaqty taldap, aıtyp berdim. Osynyń arqasynda úsh kezeńnen de súrinbeı óttim. Menińshe, jańa ǵana Prezıdentimiz usynǵan partııanyń baǵdarlamasynda aıtylǵan «barshaǵa teń múmkindik berý» degen osy.

Baǵdarlamadaǵy «áıelderdiń bas­shylyq oryndardaǵy úlesi 30 paıyzǵa jetedi» degen maqsattyń oryndalatyna tolyq senemin. Sózine qashanda isi saı Nur Otan partııasy úshin qazaqstandyq áıelderdiń qoǵamdaǵy róli kúsheıgeni óte mańyzdy», dedi Á. Ábsemetova.

Budan keıin sóz kezegi Nur Otan par­tııa­sy Saıası keńesiniń múshesi, «Ata­me­ken» ulttyq kásipkerler palatasy Basqarma tóraǵasy Abylaı Myrzah­metovke berildi.

«Elbasy jetekshilik etetin partııa bıznes pen qoǵam arasyndaǵy baılanystyrýshy kópirge aınaldy. Qazirgideı daǵdarysty kezeńde bıznes ókilderine eń áýeli turaqtylyq pen erteńgi kúnge degen senim qajet. Ony bizdiń Nur Otan partııasy ǵana bere alady.

Jańa ǵana Memleket basshysy Qasym-Jomart Kemelulynyń baıandama­synda aıtylǵandaı, partııanyń baǵdarla­masynda shaǵyn nesıeler sanyn ulǵaıtý, salyqtar sanyn qysqartý, salyq salýda sıfrly tehnologııalardy engizý sııaqty kóptegen usynystar bar. Munyń bári eldegi shaǵyn jáne orta bıznesti odan ári damytýǵa, ıaǵnı ulttyq ekonomıkany kúsheıtýge múmkindik beretini sózsiz.

Nursultan Ábishuly, siz júrgizgen refor­malardyń nátıjesinde, elimizde iskerliktiń órkendeýine barlyq jaǵdaı jasaldy. Biz naryqtyq ekonomıkaǵa kóshtik, otandyq kásipkerliktiń tutas býyny qalyptasty, jańa óndiris oryndary ashylyp, Indýstrııalandyrý baǵdarlamasy, Bıznestiń jol kartasy sııaqty mańyzdy qujattar qabyldandy.

Osy jyldary el ekonomıkasyna 330 mlrd dollar tikeleı ınvestısııa quıylǵan. Sizdiń bastamańyzben qazaq­standyq bıznesti biriktirgen «Atameken» Ulttyq kásipkerlik palatasy quryldy», dedi A.Myrzahmetov.

Jıyn barysynda Petropavl qala­synda ótken praımerızdiń jeńimpazy, halyqaralyq dárejedegi sport sheberi, jeńil atletıkadan Azııa chempıony Irına Ektova da óz pikirimen bólisti.

«Dostarymmen birge Biz Birgemiz aksııasyna qatystym. Biz volonter bolyp, qalamyzdaǵy júzdegen otbasyna bardyq. Azyq-túlik jetkizip, ystyq tamaq tasydyq. Osyndaı ıgi ister arqyly partııa adamdarǵa jaqyndaı tústi.

Men – Jas Otannyń belsendisimin, biraq saıasatqa jaqynda ǵana qyzyǵý­shy­lyq tanyta bastadym. О́z elime depýtat retinde paıda ákelgim keledi. Son­dyqtan praımerızge qatysyp, kúshimdi synap kóremin dep sheshtim. Bul men úshin naǵyz jarys.

Nátıjesinde, Petropavl qalasy bo­ıynsha áıelder men jastar arasynda birinshi oryn aldym. Maǵan senip, daýys bergenderdiń barlyǵyna rahmet aıtqym keledi», dedi I.Ektova.

Sonymen qatar sezde belgili aıtys­ker aqyn Muhtar Nııazov ta sóz sóılep, Nur Otan bos sózge emes, is tyndyrýǵa umtylatyn partııa ekenin jetkizdi.

«Qazaq degen yrymshyl halyqtyń balasymyn ǵoı, osyny jaqsylyqqa balap, kóńildegi kórkem oıdy aqtarsam deımin. Táýelsizdik alǵan jyldary men mektep tabaldyryǵyn endi attaǵan bala edim. Kók baıraqtyń astynda ósip-jetilgenimdi Jańa dáýirdiń urpaǵy ekenimdi maqtanysh etem!

Búginde bizdiń Qazaqstan – tórt qubylasy teń, yrysy tolyq, birligi myǵym el. Osy jyldardaǵy oljamyzdy túgendesek, ulan-ǵaıyr jerimizdiń shekarasyn shegeledik. Arqanyń tósine astanamyzdy saldyq. Toqsanynshy jyldary halyqtyń úshten biri ǵana bolǵan qazaqtyń sany búginde 70 paıyzdan asty. Az jylda basqa eldermen terezemiz teńesti. Tól mádenıetimiz ben ulttyq ónerimizdiń qurmeti ósti», dedi M.Nııazov.

Aıtysker aqyn óz sózinde jyl saıyn partııanyń qoldaýymen «Altyn dombyra» respýblıkalyq aıtysy, el ishinde ártúrli respýblıkalyq jáne aımaqtyq aıtystar ótetinine nazar aýdardy.

«Bıyl tuńǵysh ret ótken partııanyń aldyn-ala saılaýy – praımerızdi men aıtysqa uqsatamyn. El aýmaǵynda ótken aıtys-debattardy dúıim jurt tamashalady. Pikirtalastar ashyq jáne ádil ótti. Belgili aıtysker aǵalarymyz – Arqanyń sal-serisi Amanjol Áltaev pen aıtystyń Aqtańgeri Aıbek Qalıev saıası dodada júzden júırik shyǵyp, jeńiske jetti.

Nur Otan osylaısha tyńnan túren salyp, kózi ashyq, kókiregi oıaý azamattardy qoǵamdyq isterge tartyp, el saıa­satyna aralasýǵa uıystyryp júr. Sońǵy jarty jylda barlyq aımaqta par­tııa­nyń óńirlik baǵdarlamalary talqy­landy, halyq súzgisinen ótti. Men de Qyzylorda qalasynyń jáne oblys­tyń baǵdarlamasyn daıyndaýǵa ún qos­tym. Birde-bir partııa dál osyndaı halyq­tyq talqylaýdan ótken, ár aýyl, ár aı­maq­tyń máselesin sheshýdi kózdegen 216 baǵ­dar­lama jasaǵan emes», dedi M.Nııazov.

Sonymen qatar ol partııanyń Respýb­lı­kalyq baǵdarlamasy óziniń keshen­dili­gimen, naqty azamattarǵa arnal­ǵan­dy­ǵymen ózgeshe dep esepteıtinin jet­kizdi.

«Halyqtyń múddesin túgendeıtin, qoǵamnyń talap-tilekterin eskergen qujat bul. Onyń ishinde mádenıeti bıik, oıy ozyq qoǵam qurýǵa arnalǵan bóligi kóńilimnen shyqty. Nur Otan aqyn-jazýshylardy, dramatýrg-ssenarısterdi, shyǵarmashylyq tulǵalardy qoldaıdy. Iаǵnı halyqtyń ar-ujdanyn oılaıdy. Ulttyq tarıh pen mádenıetti qasterlep, kıno, murajaı men kitaphanalarǵa qam­qor­­lyq jasaıdy. Munyń bári partııa baǵ­dar­la­masynda taıǵa tańba basqandaı anyq jazylǵan.

Ras, aldaǵy bes jyldyń júgi aýyr. Bir qazan súttiń bir qasyq uıtqysy bolady. Nur Otan bos sózge emes, is tyn­dyrýǵa umtylatyn partııa! Árdaıym jabyrqaǵannyń janynan tabylyp, jár­dem berip keledi. Sondyqtan eldiń tynysh­tyǵy men berekesin oılaǵan azamattar Elbasy men Memleket basshysynyń  saıa­satyn, partııanyń baǵytyn qoldaıdy. Jamandyqty amandyq jeńedi, tatý elge taqsyret jýymaıdy», dedi M.Nııazov.

 

Kandıdattar tizimi bekitildi

Sezd barysynda Májilis saılaýyna Nur Otannyń partııalyq tizimi bekitildi. Tizimde 126 kandıdat bar. Olardyń ishinde 77 kandıdat partııaishilik praımerız qorytyndysy, al 49 adam ortalyq partııalyq kvota boıynsha anyqtaldy.

Kandıdattardyń jalpy tiziminde Par­lament Májilisiniń qyzmettegi depýtattary 20 paıyzdan aspaıdy. Memlekettik basqarý salasynyń ókilderi – 13 paıyz, bilim jáne densaýlyq saqtaý salasy – 12 paıyz, úkimettik emes uıymdar – 9 pa­ıyz jáne ónerkásip ókilderi 8 paıyzdy qurady.

Sondaı-aq tizimdegi ekonomıster úlesi – 28 paıyz, zańgerler – 20 paıyz, kásipkerler – 17 paıyz. Al 21 úmitkerdiń ǵylymı dárejesi bar, onyń ishinde 10-y – ǵylym doktory,  11-i – ǵylym kandıdaty. Tizimdegi kandıdattardyń úshten biri – áıelder. Kandıdattardyń ortasha jasy burynǵy partııalyq tizimdermen salystyrǵanda 4 jylǵa tómendep, 48 jasqa jetti.

Eske sala keteıik, Nur Otan partııa­synyń praımerızine 10 myńnan astam kandıdat, al respýblıkalyq onlaın-daýys berýge 662 myńnan asa adam nemese barlyq nurotandyqtardyń 84 paıyzy qatysty.

Onyń qorytyndysy boıynsha 6 253 adam Nur Otannyń barlyq deńgeıdegi 216 máslıhatqa arnalǵan partııalyq tizimine endi. Taldaý kórsetkendeı, óńirlik partııalyq tizimderde áıelderdiń úles sany 22-den 34 paıyzǵa deıin, jastar – 3,5 ese, 7-den 24 paıyzǵa deıin artty. Ortasha jasy máslıhattardyń qyz­met­tegi quramymen salystyrǵanda 7 jasqa – 51-den 44-ke deıin jasardy. Partııalyq tizimderdiń 24 paıyzyn máslıhattardyń qyzmettegi depýtattary quraıdy, al 76 paıyzy – jańa tulǵalar.

Bul rette partııaǵa 42 myńnan asa jańa múshe qosyldy. Olardyń 1000-nan astamy partııaishilik saılaýǵa qatysyp, árbir úshinshisi Nur Otannyń partııalyq tizimine endi.

Halyqtyń belsendi qatysýynyń arqasynda praımerız barysynda Nur Otan partııasynyń 216 óńirlik saılaýaldy baǵdarlamasy talqylanyp, qabyldandy. Onda azamattardan túsken 17 myńnan astam usynys eskerildi.