Senat depýtattary Narıman Tóreǵalıev pen Dınar Nóketaeva palata janynan qurylǵan Jas sarapshylar klýbynyń múshelerimen kezdesti. Onda Qazaqstan Respýblıkasynyń jańa áleýmettik kodeksiniń tujyrymdamasy keńinen talqylandy.
«Memleket basshysynyń tapsyrmasy boıynsha qazir «Áleýmettik kodekstiń» jobasy ázirlenip jatyr. Zań jobasyn daıyndaý kezinde biz sarapshylardyń pikirin eskerýimiz kerek. Sondaı-aq áleýmettik saıasattyń barlyq máselelerin egjeı-tegjeıli qarastyryp, normatıvtik quqyqtyq aktilerdi bir kodekste júıeleý qajet. Bul, eń aldymen, azamattarymyz úshin qolaıly», dedi Narıman Tóreǵalıev.
Depýtattar men sarapshylar «Áleýmettik kodekste» zeınetaqymen qamsyzdandyrý, áleýmettik kómek pen saqtandyrý, áleýmettik kepildikterdi, sondaı-aq mınımaldy áleýmettik standarttar men áleýmettik táýekelderdi basqarý jáne halyqty áleýmettik qorǵaý salasyndaǵy qoǵamdyq qatynastardyń keń spektri qamtylýy kerek dep esepteıdi.
«Bul qujat eń tómengi jalaqy, kúnkóris mınımými, kedeılik shegi enetin, olardy qalyptastyrý tetikteri aıqyn jáne halyqqa túsinikti bolatyn áleýmettik standarttarǵa negizdelýi kerek», deıdi ekonomıst Asqar Qysyqov.
Sonymen qatar Senat janyndaǵy Jas sarapshylar klýbynyń ókilderi «Áleýmettik kodekste» qazaqstandyqtardyń áleýmettik-ekonomıkalyq quqyqtary men bala quqyqtaryn qorǵaýdyń sharalary belgilenip, qaıyrymdylyq, eriktiler jáne áleýmettik kásipkerlik máseleleri eskerilýi kerek degen pikir qosty, dep habarlady Parlament Senatynyń baspasóz qyzmeti.