Almatydaǵy "Dostyq" sport kesheninde grek-rım kúresinen ótken Qazaqstan chempıonatynda 77 kılo salmaqta "naǵyz jan alysyp, jan berisken" básekelerdiń kýási boldyq, dep habarlaıdy Egemen.kz.
77 kılo salmaqta bas júlde úshin tartys Almaty oblysynyń qos sańlaǵy – Ashat Dilmuhamedov pen Demeý Jadyraevtyń arasynda ótti. Bul básekeni barsha mamandar tapjylmaı tamashalady. Biraz jyldan beri osy salmaqtyń tizgini Ashattyń qolynda. Onyń Azııa chempıony jáne sol jarystyń úsh dúrkin júldegeri degen ataqtary bar. Álemdik dodalarda Dilmuhamedov jeńis tuǵyryna synyq súıem qalǵanda ǵana súrinip júr.
Demeý 2017 jyly Parıjde ótken álem chempıonatynyń kúmis júldegeri. Qurlyqtyń basty dodasynda eki ret jeńis tuǵyryna kóterildi. Biraq bul ataqtarǵa ol sál jeńil salmaqtarda qol jetkizdi.
Soǵan qaramastan Jadyraev Almatydaǵy jarysta ózin jaqsy qyrynan kórsetti. Fınalda Ashattan 7:3 esebimen aılasyn asyrǵan Demeý el chempıony atandy. Azııa chempıondary Maksat Erejepov pen Temirlan Shadýkaev qola medaldi qorjyndaryna saldy.