Sol qoldyń soqqysy san soqtyrdy

Bul eki boksshynyń jekpe-jegi áý basta osy jyldyń naý­ryz-sáýir aılarynyń birinde ótýi tıis bolǵan. Alaıda álem jur­tyna qaýip tóndirgen koronavırýs pandemııasynyń saldarynan aıqas birneshe ret keıinge shegerile berdi. Dese de ýáde etse oryndamaı qoımaıtyn promoýter Eddı Hırn Danııarǵa báribir osy boks keshin uıymdastyryp, jigittik sertinen aınymady. Al Eleýsinov óz kezeginde qazaq­standyq jankúıerlerdiń de, ózine senim artqan promoýter­diń de senim údesinen shyǵa bildi.

Namıbııanyń Vındhýk qa­la­synda dúnıege kelgen 37 jas­taǵy Djýlıýs Indongo kásipqoı boksta 2009 jyldan be­ri baq synap keledi. Eń alǵash jeńil salmaqta óner kórsetken ol iri jekpe-jegin jartylaı orta salmaqta ótkizdi. Kásibı sharshy alańdaǵy 20 jekpe-jegin óz otanynda ótkizgen ol tek 2016 jyldan bastap she­telde judyryqtasa bastady. Sol jyly sharshy alańda bir­de-bir ret jeńilmegen re­seı­lik boksshy Edýard Troıa­novskımen kezdesip, IBF jáne IBO tujyrymdary boıynsha álem chempıony degen ataq­tarǵa qol jetkizdi. Sóıtip kásip­qoı boks áleminde sensasııa ja­sa­dy. Araǵa bir jyl salyp Indongo WBA beldiginiń ıegeri brıtanııalyq tanymal boks­shy Rıkı Bıornsti de jeńip, jar­tylaı orta salmaqtaǵy úsh birdeı beldiktiń ıesi atandy. Bul onyń otanynan tysqary elde ótkizgen nebári ekinshi jek­pe-jegi edi. Eki jyldyń ishinde álemniń boks juldyzyna aınalǵan ol munymen toqtap qalǵysy kelmeı, 2017 jyldyń tamyz aıynda álemniń absolıýt­ti chempıony ataný úshin amerı­kalyq áıgili boksshy Terens Kroý­fordty jekpe-jekke sha­­­­qyrdy. О́zine tym senimdi bol­ǵan namıbııalyq boksshy úshinshi raýndta Kroýfordtyń soqqysyna tap bolyp, ońbaı jeńildi. Osylaısha Indongo bir sátte beldiginen de, abyroıy­nan da aıyrylyp qaldy. Al 2018 jyldyń naýryzynda taǵy bir amerıkalyq boksshy Redjıs Progreıspen WBC beldigine talasyp, bul joly da tehnıkalyq nokaýtpen jeńilip tyndy.

Jyl basynda Danııar Eleý­sinov kásipqoı boksta kórgeni men túıgeni mol boksshymen judyryqtasady degendi esti­gende «qalaı bolar eken?» degender az bolǵan joq. О́ıtkeni otandasymyzdyń buǵan deıingi bok­sy bizdiń de, jankúıerlerdiń de kóńilinen asa shyǵa qoıǵan joq edi. Boks mamandary da Danııarǵa myqtylarmen shyǵý úshin áli de aralyq jekpe-jek ótkizý kerek degen pikirlerin aıtqan bolatyn. «Attyń sy­ry ıesine málim» degendeı, Da­nııar­dyń dál qazirgi baby bizge qaraǵanda janynda júrgen jat­tyqtyrýshysy ári ákesi Marat Eleýsinovke ǵana málim ǵoı. Balasyn bul jekpe-jekke daıyn dep eseptegen áke bul kez­­desýdiń ótýine qarsy bolma­ǵan.

Danııardyń jekpe-jegin kór­gende onyń judyryqtasý máneri azdap ózgergenine kýá boldyq. Burynǵydaı qolyn tó­men túsirip júrý degen atymen joq. Únemi eki qolyn joǵary kó­terip, betin soqqydan qorǵap júr­di. Sondaı-aq ol ádette artqa shegine júrip, ekinshi nómirmen ju­dyryqtasatyn. Al bul joly tek alǵa umtylyp, rıngtiń qo­jaıyny ekenin qarsylasyna uq­tyrǵandaı boldy. Birinshi raýndtyń orta tusynda sol qo­ly­nyń soqqysymen qarsyla­syn nokdaýnǵa jiberdi. Ekin­shi raýndta da dál osy jaǵ­daı qaıtalandy. Úsh mınýt­tyń alǵashqy bir mınýty tú­ge­sil­gende Eleýsinovtiń sol qolymen jumsaǵan eki soqqy­sy qarsylasyna dál tıip, na­mı­bııa­lyq boksshy taǵy da esin joǵaltyp aldy. Tóreshi esep ashyp, sanaǵyn aıaqtaǵan soń Indongonyń álsiregenin kórip, jek­pe-jekti merziminen buryn toq­tat­ty.

Osylaısha jerlesimiz kare­rasyndaǵy eń alǵashqy mańyzdy kezdesýin senimdi jeńispen aıaq­tap, orta salmaqtaǵy IBF Intercontinental belbeýin beline taq­ty. Sondaı-aq ol barsha jurt­­qa reıtıngte joǵary orynda turǵan kez kelgen boksshymen judy­ryqtasýǵa qaýqary bar ekenin dáleldedi. Al Djýlıýs Indongo kásipqoı bokstaǵy úshin­shi jeńilisiniń kermek dámin tatty.