Keıingi jyldary álemdik sport juldyzdary shoý básekelerin uıymdastyrýdy dástúrge aınaldyrdy. Buryndary tek ataqty fýtbolshylar karerasyn aıaqtaý maqsatynda áriptesterimen dostyq oıyndaryn ótkizip júrse, endi bul qatarǵa kásipqoı boksshylar da qosyldy. Máselen, 2017 jyly kishi amerıkalyq Floıd Meıvezer men aralas jekpe-jek sheberi Konor Makgregor jankúıerlerge shoý uıymdastyrǵan bolatyn.
Kúni keshe mundaı shoýdyń ozyq úlgisin kezinde kásipqoı bokstyń shoqjuldyzy atanǵan Maık Taıson men kishi Roı Djons kórsetti. Áýelgi jospar boıynsha qyrkúıekte judyryqtasýy tıis bolǵan qos alyp jankúıerlerdiń qyzyǵýshylyǵyn oıatý maqsatynda jekpe-jek merzimin eki aı keıinge shegergen bolatyn. Rasymen, bul josparlary júzege asyp, jekpe-jekti kútken álem jankúıerleri bylaı tursyn, qazaqstandyqtardyń da qarasy qalyń boldy. Ony áleýmettik jelidegi jazbalardan da anyq ańǵarasyń.
Sonymen jekpe-jek alaqanyn ysqylap, taǵatsyzdana kútken bokssúıer qaýymnyń kóńilinen shyqty ma? Buǵan «ıá» nemese «joq» dep úzildi-kesildi dál baǵasyn bere almaımyz. О́ıtkeni jankúıerler eki boksshy da óz dáýirindegideı qoldy-aıaqqa turmaı julqynyp turatyn qarqyn bolmaıtynyn, ekeýinde de qarsylasyn nokaýtqa jibererdeı joıqyn soqqy joq ekenin áý basta-aq bildi. Tek 50-den asqan boksshylardyń qazirgi jaǵdaıy, mosqal tartqan shaǵynda bizdi qandaı áreketterimen tańǵaldyrady eken degen qyzyǵýshylyq bolǵany ras.
Sóıtip eki mınýttan 8 raýndqa josparlaǵan aıqasta jeńimpazdyń esimi anyqtalmady. Tóreshiler ekeýin de renjitpeıin dedi me, áıteýir jekpe-jektiń teń aıaqtalǵanyn málimdedi. Deıturǵanmen, bizdiń kózimizge Maık Taıson basymyraq ári dóp soqqyny kóp jumsaǵandaı kórindi. Alǵashqy eki raýndta belsendi bolǵan Roı Djons keıingi tórt raýndta uzaq ýaqyt kezdespegen dostardaı Taısondy qushaqtaı bergeni jekpe-jektiń shyraıyn ketirgendeı áser qaldyrdy. Osylaısha rıngte 16 mınýt óner kórsetken eki boksshy 1 mıllıon dollar tabys tapty. Aıta keteıik, Maık Taıson eń keıingi jekpe-jegin 2015 jyly ótkizgen bolsa, Roı Djons eki jyl buryn ǵana sharshy alańǵa shyqqan edi.