Atyraýda budan bes buryn aqyn Jumeken Nájimedenovtiń eńseli eskertkishi boı kótergen edi. Keıin №2 mektepke esimi berildi. Endi mine, sol mekteptiń aldynda qalamgerdiń eskertkish-músini ashyldy, dep habarlaıdy Egemen.kz.
Keshe – qazaqtyń kórnekti aqyny, Ánuran avtorlarynyń biri, QR Memlekettik syılyǵynyń ıegeri Jumeken Nájimedenovtiń týǵan kúni. Qazaq poezııasynda jarqyraı kóringen qalamgerdiń ómirge kelgenine 85 jyl toldy. Artyna mol shyǵarmashylyq mura qaldyrǵan aqynnyń esimi jańǵyryp keledi.
«Keńestik ókimet 1956 jyly qazaq jeriniń soltústik aımaǵyndaǵy Aqmola, Petropavl, Pavlodar, Qostanaı, Qaraǵandy oblystaryn Qazaq respýblıkasy quramynan bólýge árekettendi. Sol kezde Shámshi Qaldaıaqov pen Jumeken Nájimedenov qazaq jastarynyń «týǵan jerdi talaýǵa bermeımiz» degen ór rýhyn sóz ben sazǵa syıǵyza bilgen edi» deıdi oblystyq mádenıet, arhıvter jáne qujattama basqarmasynyń basshysy Aqylbek Rysqalıev.
Aqynǵa arnalǵan eskertkish-músinniń ashylýyna qoǵam qaıratkerleri Ǵarıfolla Esim, Sársenbaı Eńsegenov, aqyn, QR Memlekettik syılyǵynyń ıegeri Aqushtap Baqtygereeva, qalamgerdiń shyǵarmalaryn zerttep júrgen zańger Marat Azbanbaev, qyzy Aıken Jumekenqyzy, óńirdiń zııaly qaýym ókilderi qatysty. Aqyn aty berilgen mekteptiń aldyna eskertkish-músindi ornatý qoǵam qaıratkeri Sársenbaı Eńsegenov usynysymen qolǵa alynypty. Týyndyny jergilikti músinshi Serik Mátenııazov jasady.
«Jumeken Nájimedenovtiń beınesin somdaý ońaı bolǵan joq. Qıyndyqtar kezdesti. Sebebi, aqynnyń sýreti kóp bolǵanymen, bet pishinin naqty kórsetetin sapaly fotolary birazǵa deıin tabylmady. Kınoplenkaǵa jazylǵan sıýjetter bar eken. Alaıda ony kórý múmkin bolmady. Aqynnyń úlken qyzy Aıkenmen habarlasyp, sapaly fotolaryn taptyq. Qalamgerdiń inileri de obrazyn somdaýda kóp kómegin berdi» deıdi músinshi Serik Mátenııazov.
Byltyr Jumeken Nájimedenov atyndaǵy mektepte pedagog-uıymdastyrýshysy Vera Mıdenovanyń aıtýynsha, aqynǵa arnalǵan murajaı ashyldy. Onda aqynnyń tutynǵan buıymdary, qoljazbalary men 7 tomdyq shyǵarmalar jınaǵy qoıylypty.
Sondaı-aq, kórnekti aqynnyń týǵanyna 85 jyl tolýyna arnalǵan shara H.Dosmuhamedov atyndaǵy Atyraý memlekettik ýnıversıtetinde «J. Nájimedenov jáne qazaq poezııasynyń kórkemdik damý baǵyttary» atty halyqaralyq ǵylymı-teorııalyq onlaın konferensııamen jalǵasty. Konferensııanyń plenarlyq májilisinde Atyraý oblysynyń ákimi Mahambet Dosmuhambetovtiń quttyqtaýy oqyldy. Onlaın konferensııada «Juldyzdy Jumeken» kitabynyń avtory Ǵarıfolla Esim, Memlekettik syılyq ıegeri Aqushtap Baqtygereeva, Qazaqstan men Qyrǵyzstannyń eńbek sińirgen qaıratkeri Ilıa Jaqanov, jazýshy Mereke Qulkenov, aqyn Esenǵalı Raýshanov, fılologııa ǵylymdarynyń doktory, professor Qadyr Júsip pen Qytaı, Túrkııa, Ázerbaıjan elderinen belgili professorlar baıandama jasap, qazaq qalamgeriniń shyǵarmashylyq, adamı bolmysyn ár qyrynan áńgimelep berdi.