Tuńǵysh Prezıdent Kúni qarsańynda partııanyń barlyq fılıaldarynda "Nur Otan" partııasynyń qataryna saltanatty qabyldaý rásimi ótti, dep habarlaıdy Egemen.kz.
«Nur Otan» partııasy Qyzylorda oblystyq fılıalynyń tóraǵasy, oblys ákimi G.Ábdiqalyqova Tuńǵysh Prezıdent kúni qarsańynda partııa qataryna jańa múshelerdi saltanatty túrde qabyldady, olardy partııa Tóraǵasynyń strategııalyq josparyn júzege asyrý jolynda belsendi jumys jasap, aımaqtyń ósip – órkendeýine partııa múshesi retinde laıyqty úles qosatyndaryna senim bildirdi. Sonymen qatar «Halyq alǵysy» tósbelgisiniń ıegerlerin marapattady.
Partııa qataryn kásipkerler, muǵalimder men ǵalymdar, jýrnalıster, stýdentter tolyqtyrdy.
Saltanatty sharanyń alǵy sózinde oblys ákimi Gúlshara Ábdiqalyqova aldymen barlyq qatysýshylardy QR Tuńǵysh Prezıdenti kúnimen quttyqtap, Táýelsiz qazaq memleketiniń saıası sahnasynda erekshe oryn alǵan tarıhı tulǵa, Elbasy Nursultan Ábishuly Nazarbaevtyń eńbegine toqtalyp, aldaǵy mindetterdi atap ótti.
«25 qarashada ótken kezekten tys HH sezde Partııa Tóraǵasy Nursultan Ábishuly partııa jumysyn jańǵyrtýdy qorytyndylady.Partııamyzdyń myqty lıderleri aıqyndalyp, aldaǵy baǵdarlama bekitildi.Bul turǵyda barlyq partııalastarymyz úshin Nursultan Ábishulynyń HH sezdeatap ótken jaýapkershilik, judyryqtaı jumylý, ortaq murat-maqsattarǵa adaldyq qaǵıdalary basshylyqqa alynýy tıis.Partııanyń negizgi úsh qaǵıdasyn ustaný bizge Elbasy saıasatynyń sabaqtastyǵyn qamtamasyz etýge múmkindik beredi. Sondyqtan búgingi saltanatty shara partııa qataryna jańadan qabyldanýshylarǵa úlken jaýapkershilik júkteýmen qatar, aldaǵy jumystardy atqarýǵa mol kúsh – qýat bereri sózsiz», - dedi oblystyq fılıal tóraǵasy.
Jańadan partııa qataryna qosylǵan azamattar atynan sóz alǵan Qyzylorda qalalyq M.Eralıeva atyndaǵy mádenıet úıiniń dırektory, respýblıkalyq «Serper» syılyǵynyń ıgeri, aıtysker aqyn Nurmat Mansurov «Nur Otan» – Elbasynyń, eldiń partııasy, halyqtyń qamqorshysy ekenin atap ótip, partııa qataryna qosylǵan árbir azamat elimizdiń damýy, halqymyzdyń ál aýqatynyń artýy jolynda aldyna maqsat qoıyp, sol maqsatynyń ornydalýyna jumys jasaý kerek ekenin aıtty.
Tuńǵysh Prezıdent kúni qarsańynda elmen birge damyp, halyqpen qatar jasasyp, zaman talabyna saı jańaryp, jańǵyryp kele jatqan «Nur Otan» partııasynyń qataryna qabyldanǵanym úshin sheksiz rızamyn ,- dedi, qýanyshymen bólisken Mansur Nurmat.
Aıta keteıik, partııa qataryna 13 azamat qabyldanyp, 4 adam «Halyq alǵysy tósbelgisimen marapattaldy. Búgingi kúni «Nur Otan» partııasy Qyzylorda oblystyq fılıalyna qarasty 11 fılıalǵa jalpy sany 43 810 partııa múshesi tirkelgen.