Túrkistan oblysynda polıseıler mal urysyn ustap, urlanǵan eshkilerdi aýyl turǵynyna qaıtaryp berdi, dep habarlaıdy Egemen.kz Polisia.kz-ke silteme jasap.
Shardara APB-niń kezekshi bólimine aýyl turǵynynyń biri túngi ýaqytta onyń qorasynan belgisiz bireýler eki eshkisin urlap ketkeni týraly aryzdanǵan.
Zardap shekken aýyl turǵynyna keltirilgen shyǵynnyń jalpy kólemi 100 myń teńgeden astam. Polıseıler bul jaıtty SDTBT-ǵa QR QK-niń 188-1-baby (Mal urlyǵy) boıynsha tirkep, qylmysty ashýǵa birden kiristi. Mal urylaryn ustaýǵa APB-niń jedel-tergeý toby men ýchaskelik ınspektorlar jumyldyryldy.
Polısııa qyzmetkerleri jaqyn mańdaǵy barlyq jaıylymdar men aýlalardy aralap, kýágerlerden surastyryp, mal satatyn bazarlardy, sondaı-aq urlanǵan múlikti tasymaldaýy múmkin degen kólikterdi tekserdi. Jedel-izdestirý is-sharalarynyń nátıjesinde Shardara APB-niń qyzmetkerleri kúdiktilerdi “izin sýytpaı” ustady. Olar buryn urlyq jasaǵany úshin jaýapqa tartylǵan jergilikti turǵyndar bolyp shyqty. Tártip saqshylary zattaı dálel retinde urlanǵan eshkilerdi tárkilep, zańdy ıesine qaıtaryp berdi. Qazirgi ýaqytta atalǵan jaıt boıynsha sotqa deıingi tergeý amaldary júrgizilýde. Kúdiktilerdiń bas sharasy qolhatta.
Tergeý barysynda atalmysh mal urlyǵynan basqa da qylmystarǵa qatystylyǵy anyqtalýda. Shardara aýdanynyń turǵyny kásibı sheberlikterin kórsetip, mal urysyn jedel ustap, urlanǵan malyn qaıtarǵan Shardara APB-niń jedel ýákilderi men ýchaskelik polısııa ınspektorlaryna úlken alǵys bildirdi. Túrkistan oblysynyń polıseıleri mal ıelerine saq bolýǵa jáne múlikterin qaraýsyz qaldyrmaýǵa keńes beredi.
Sharýashylyq aýlalary men qoralardy senimdi qorshaýmen nyǵaıtyp, aýlalardy jaqsy jaryqpen jabdyqtaý qajet. Sondaı-aq, malǵa en-tańba saldyrýdy umytpańyz. Mal urlanǵan nemese joǵalǵan jaǵdaıda dereý polısııaǵa, “102” telefony boıynsha habarlasý kerek. Bul óz kezeginde qylmysty “izin sýytpaı” ashýǵa kómektesedi.