Qazaqstan Soltústik Eýropa ınvestorlarynyń nazarynda, dep habarlaıdy Egemen.kz
Qazaqstannyń Fınlıandııa, Shvesııa, Danııa jáne Norvegııamen ınvestısııalyq jáne saýda-ekonomıkalyq yntymaqtastyǵynyń múmkindikteri «Qazaqstan - Soltústik Eýropa» isker toptarynyń alǵashqy ınvestısııalyq kezdesýi aıasynda talqylandy.
Is-sharaǵa Soltústik Eýropanyń 200-den astam kompanııasy qatysty. Is-sharada QR Syrtqy ister mınıstriniń orynbasary Almas Aıdarov, Danish Industry dırektory Iens Holst-Nılsen, QR-daǵy Eýropalyq Odaq delegasııasynyń basshysy Sven-Olov Karlsson, sondaı-aq eki eldiń bıznes-qoǵamdastyǵy, saýda-ónerkásip palatalary, salalyq mınıstrlikter men kvazımemlekettik organdar ókilderi sóz sóıledi.
Is-sharany ashqan QR Syrtqy ister mınıstriniń orynbasary Almas Aıdarov pandemııanyń teris áserine qaramastan, Qazaqstan ózara tıimdi yntymaqtastyq úshin jańa múmkindikter izdeýdi jalǵastyryp jatqanyn atap ótti. Osyǵan baılanysty el Soltústik Eýropa elderimen seriktestikti keńeıtýge jáne tereńdetýge múddeli.
«Táýelsiz Qazaqstan tarıhynda alǵash ret biz Soltústik Eýropa elderiniń qatysýymen ınvestforým uıymdastyrýdamyz. Bizdiń ózara is-qımylymyzdyń deńgeıi negizsiz tómen dep sanaımyn. Bizdiń elderimiz uzaq merzimdi ózara tıimdi yntymaqtastyq úshin, ásirese, balyq pen bıdaı ósirý jáne qaıta óńdeý, JEK, munaı-hımııa jobalaryna arnalǵan jabdyqtar óndirý, sondaı-aq sıfrlandyrý sııaqty mańyzdy sektorlarda zor áleýetke ıe. Bizdiń elimiz ınvestısııalyq ahýaldy jaqsartýǵa baǵyttalǵan reformalardy dáıekti túrde damytyp keledi. Biz Úkimet pen ınvestorlar arasynda tikeleı jáne ashyq dıalogty, sondaı-aq jańa ınvestısııalardy, ozyq tehnologııalar men noý-haýdy tartý úshin ınfraqurylymdy únemi jaqsartýdy qamtamasyz etemiz», dep atap ótti Almas Aıdarov.
«Qazaqstan Respýblıkasynyń ınvestısııalyq múmkindikteri» sessııasynda sóz sóıleý barysynda «KAZAKH INVEST» UK» AQ Basqarma Tóraǵasy Baýyrjan Sartbaev sheteldik bıznesti qoldaý sharalarymen, sondaı-aq forýmǵa qatysýshylardy eldiń ınvestısııalyq áleýetimen tanystyrdy.
Onyń aıtýynsha, búginde kompanııa Qazaqstanǵa ınvestısııa salǵysy keletin ınvestorlarǵa 100-den astam ınvestısııalyq usynys usynýǵa daıyn. Investısııalyq usynystarǵa bıznes-jospar, qarjylyq model jáne áleýetti jergilikti seriktesti tańdaý kiredi.
«KAZAKH INVEST jobalardy basqarý jáne keńes berý salasynda kóptegen quzyretterge ıe. Búgingi kúrdeli kezeńde ınvestorlarǵa barlyq qajetti qoldaýdy usyný bizdiń basymdyǵymyz bolyp tabylady», dep habarlady Baýyrjan Sartbaev.
Sonymen qatar, is-shara barysynda «Aller Aqua» AS, «BTG Solenergy», «Arla Foods Amba» AS, «AF Gruppen», «ThermoSeed Global AB», «Trade Scandinavia» AV, «Geodesign Barriers», «Nord Development Consulting», «Swedavia Airports» jáne t. b. iri kompanııalarmen ekijaqty kezdesýler uıymdastyryldy.
Is-sharany QR Syrtqy ister mınıstrligi, QR Shvesııadaǵy (Danııa), Norvegııadaǵy jáne Fınlıandııadaǵy elshilikteri, sondaı-aq «KAZAKH INVEST» UK» AQ jáne Oslo qalasynyń Saýda palatasy uıymdastyrdy.
Aıta ketý kerek, 2005 jyldan bastap Shvesııa, Norvegııa, Danııa jáne Fınlıandııa Qazaqstan ekonomıkasyna jalpy alǵanda $2,4 mlrd-tan astam ınvestısııa saldy, tek sońǵy 4 jyldyń ishinde Soltústik Eýropa men Qazaqstan arasyndaǵy taýar aınalymy $3 mlrd-tan astam somany qurady, búginde Qazaqstanda álemge áıgili «Metso», «Wartsila», «Tikkurila», «Ericsson», «Scania», «ABB», «Electrolux», «H&M», «Novo Nordisk», «Castrol» sııaqty kompanııalar tabysty jumys isteýde.