L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetiniń bilim alýshylary «The London Post»gazetiniń bas redaktory, BBC telearnasynyń aǵa sarapshysy doktor Shahıd Kýreshımen onlaın kezdesti, - dep habarlaıdy Egemen.kz
Doktor Shahıd Kýreshı feık aqparattyń taralý joldarynan bastap, onyń álemdik saıası oqıǵalarǵa, ekonomıkalyq ahýalǵa tıgizetin saldaryna toqtaldy. Onlaın kezdesýdi uıymdastyrýshy «Bolashaq» baǵdarlamasynyń túlegi, baspasóz jáne baspa isi kafedrasynyń aǵa oqytýshysy Ǵalymjan Qaramanuly feık jańalyqty anyqtaý ádisteri, jýrnalıst jaýapkershiligine baılanysty saýaldar qoıyp, tushymdy jaýap aldy. Magıstranttar men doktoranttar álemdik saıası oqıǵalar men aımaqtyq qaqtyǵystarǵa qatysty jýrnalıst-sarapshynyń pikirin tyńdady.
Sarapshynyń aıtýynsha qazirgi tańda uıaly telefon arqyly taraıtyn aqparatty baqylaý múmkin emes. Soǵan qaramastan árbir azamat aqparatty súzgiden ótkizip baryp sińirýge daǵdylanǵany jaqsy. Ol úshin kúndelikti aqparat oqýǵa úırenýi kerek. Ýaqyt óte kele feık aqparatty anyqtaı alatyn bolady.
Jýrnalıstıka magıstranttary tarapynan qoıylǵan saýaldardyń mańyzyna toqtalǵan Shahıd Kýreshı aqparattyq qyzmettegi kásibı jaýapkershilikke erekshe toqtaldy. Atap aıtar bolsaq, suraq qoıa bilý ónerin meńgerý, saıası oqıǵaǵa qatysty pikirdi naqtylap baryp jarııa etý, feık aqparatty anyqtaý ımmýnıtetin qalyptastyrý, dinge qatysty kózqarasqa óte saq bolý, senimsiz aqparatty taratpaý nemese taratyp qoıǵan jaǵdaıda qateńdi moıyndaý sekildi máselelerge baılanysty jastarǵa keńes berdi.
Kezdesý barysynda Bı-Bı-Sı medıakorporasııasynyń aqparattyq qyzmeti jaıly kóptegen qyzyqty málimetter aıtyldy. Aıta keteıik, onlaın kezdesý aǵylshyn tilinde ótti. Magıstranttar men doktoranttar aqparat sarapshysy, bas redaktor Shahıd Kýreshımen erkin pikir almasty. Qazirgi tańda halyqaralyq jýrnalıstıka bilim berý baǵdarlamasy boıynsha magıstranttar aǵylshyn tilinde bilim alýda. Bul – bolashaq maman daıarlaýdaǵy L.N.Gýmılev atyndaǵy Eýrazııa ulttyq ýnıversıteti jýrnalıstıka jáne saıasattaný fakýltetiniń búgingi qol jetkizgen joǵary nátıjesi.