Búgin Sybaılas jemqorlyqqa qarys is-qımyl Agenttiginiń alańynda vedomstvo basshysy Alık Shpekbaev pen "Ádildik joly" respýblıkalyq qoǵamdyq birlestigi keńesiniń tóraǵasy Islambek Saljanov yntymaqtastyq týraly memorandýmǵa qol qoıdy, dep habarlaıdy Egemen.kz.
Yntymaqtastyqtyń maqsaty – sybaılas jemqorlyqqa qarsy saıasatty iske asyrý, sybaılas jemqorlyqqa qarsy is-qımyl boıynsha qabyldanatyn sharalardyń tıimdiligin arttyrýǵa, parasattylyq ıdeologııasyn ilgeriletý, sybaılas jemqorlyq quqyq buzýshylyqtar jasaýǵa yqpal etetin sebepter men jaǵdaılardy joıýǵa baǵyttalǵan is-qımyldardy ázirleý jáne iske asyrý.
A.Shpekbaev atap ótkendeı, «Sybaılas jemqorlyqqa qarsy qyzmetke qoǵamdy keńinen tartý el basshylyǵy men Agenttiktiń negizgi basymdyǵy bolyp otyr.
Bul – azamattardyń talaptaryna jáne jalpy qabyldanǵan halyqaralyq standarttarǵa jaýap beretin qazirgi zamanǵy sybaılas jemqorlyqqa qarsy saıasattyń negizgi alǵysharty. Jemqorlyq – indet, ony joıý bárimizge ortaq mindet».
Sybaılas jemqorlyqqa qarsy qyzmet búginde azamattyq qoǵammen syndarly áriptestiktiń úzdik tájirıbesin kórsetip otyr. Buǵan «Adaldyq alańy», arnaıy monıtorıngtik toptar, aqparattyq-aǵartý shtabtary, «Adal kómek» jobasy men jastardyń sybaılas jemqorlyqqa qarsy qozǵalystary sııaqty sybaılas jemqorlyqqa qarsy jobalarǵa tartylǵan 100 myńǵa jýyq qoǵam ókilderi – eriktilerdiń qoldaýy dálel boldy.
О́z kezeginde Islambek Saljanov: «Sybaılas jemqorlyq bizdiń moraldyq negizderimizge keri áserin tıgizip, áleýmettik ádilettiligimizge nuqsan keltiretin jáne elimizdiń áleýmettik-ekonomıkalyq damýyn tejeıtin qoǵam derti. Álemdik tájirıbe kórsetip otyrǵandaı, sybaılas jemqorlyqpen kúresýdiń negizi sybaılas jemqorlyq oryn alyp jatqan oqıǵalarǵa azamattardyń salǵyrt qaramaýynda», – dedi.
Sondaı-aq, sybaılas jemqorlyqty joıý jolynda ár qazaqstandyqtyń qosqan úlesiniń mańyzdylyǵyn atap ótti.
Shara sońynda qatysýshylar barsha azamatty elimizdiń ál-aýqatyn kóterip, gúldendirý maqsatynda sybaılas jemqorlyqpen birge kúresýge shaqyrdy.