Majarstannyń jańa premer-mınıstri Peter Madıar el prezıdenti Tamash Shýıokty laıyqsyz dep atap, qyzmetinen ketýge shaqyrdy. Bul týraly premer Shandor saraıynda prezıdentpen ótken kezdesýden keıin X jelisinde jazdy, dep habarlaıdy Egemen.kz.
Madıardyń pikirinshe, Shýıok zańdylyqtyń kepili bolýǵa qabiletsiz ári moraldyq turǵydan úlgi bola almaıdy. Osyǵan baılanysty premer jańa úkimet jasaqtalǵannan keıin prezıdenttiń dereý otstavkaǵa ketýi tıis ekenin jetkizdi.
Toqaev Peter Madıardy Majarstandaǵy parlament saılaýynda jeńiske jetýimen quttyqtady
О́z kezeginde Tamash Shýıok bılikti tapsyrýdyń múmkin merzimi retinde mamyr aıynyń alǵashqy aptasyn ataǵan. Alaıda Madıar bılik aýysýy múmkindiginshe jedel júzege asýy kerektigin aıtyp otyr. Eger prezıdent óz erkimen ketpese, úkimet konstıtýsııalyq ózgerister engizip, ony qyzmetinen ketirýge daıyn ekenin málimdedi. Sondaı-aq ol burynǵy premer Vıktor Orban yqpalynda bolǵan júıeden tolyq arylý qajettigin aıtty.
Jańa premer buǵan deıin memlekettik BAQ-taǵy jańalyq qyzmetteriniń jumysy ýaqytsha toqtatylatynyn da málimdegen. Onyń aıtýynsha, bul qurylymdar uzaq jyldar boıy burynǵy bıliktiń úgit quralyna aınalǵan.
45 jastaǵy Peter Madıar 12 sáýirde ótken saılaýda aıqyn basymdyqpen jeńiske jetip, saılaýshylardyń úshten ekisiniń qoldaýyna ıe boldy. Ol eldi «qaıtadan eýropalyq memleketke aınaldyrýǵa» ýáde berip, ekonomıkany jandandyrý, densaýlyq saqtaý júıesin reformalaý jáne jemqorlyqpen kúresýdi negizgi baǵyttardyń biri retinde atady.
Aıta keteıik, Majarstanda prezıdentti parlament saılaıdy jáne ol negizinen rásimdik qyzmet atqarady. Degenmen memleket basshysy Qarýly kúshterdiń Joǵarǵy bas qolbasshysy bolyp sanalady, zań jobalaryn usyný jáne referendým jarııalaý quqyǵyna ıe.